BAKI, AzerVoice, Səməd Əyyubov – ABŞ Prezidenti Donald Tramp Hindistandan idxal olunan və yenidən satılan Rusiya nefti ilə bağlı rüsumların əhəmiyyətli dərəcədə artırılacağını bəyan edib.
AzerVoice xəbər verir ki, bu barədə o, “Truth Social” sosial şəbəkəsində yazıb.
Onun sözlərinə görə, Hindistan yalnız böyük həcmdə Rusiya nefti almaqla kifayətlənmir, həm də onun mühüm hissəsini sərbəst bazarda yüksək mənfəətlə satır.
“Bununla əlaqədar olaraq, Hindistanın ABŞ-a ödədiyi rüsumları əhəmiyyətli dərəcədə artıracağam” – deyə Tramp bildirib.
Bundan əvvəl Tramp Hindistana qarşı 25 faizlik ticarət rüsumu tətbiq olunduğunu açıqlamışdı. O, iki ölkə arasında dost münasibətlərə baxmayaraq, ABŞ-ın Hindistanla ticarətinin yüksək rüsumlar və sərt qeyri-maliyyə maneələri səbəbindən nisbətən az olduğunu vurğulayıb.
Tramp həmçinin qeyd edib ki, Hindistan hərbi texnikasının böyük hissəsini Rusiyadan alır və Çindən sonra Rusiyanın ən iri enerji resursları alıcılarından biridir.
Avqustun 3-də Ağ Evin aparat rəhbərinin müavini Stiven Miller isə bildirib ki, Trampın fikrincə, Hindistan Rusiya nefti alaraq Ukraynadakı müharibəni maliyyələşdirir.
