BAKI, AzerVoice, Səməd Əyyubov
ABŞ Prezidenti Donald Tramp, Rusiya Prezidenti Vladimir Putinlə Alyaskada keçirəcəyi görüşün uğurla nəticələnmə ehtimalını 75 faiz olaraq qiymətləndirib.
AzerVoice xəbər verir ki, Tramp bu fikri “Fox News Radio”ya verdiyi müsahibədə səsləndirib.
“Bu, şahmat partiyasına bənzəyir. Görüş əsasən ikinci görüşə hazırlıq xarakteri daşıyır. Amma 25 faiz ehtimal var ki, bu danışıqlar gözlənilən nəticəni verməsin” – deyə, o bildirib.
Tramp əlavə edib ki, əgər Putinlə danışıqlar uğurla başa çatsa, Ukrayna Prezidenti Volodimir Zelenskinin də iştirakı ilə üçtərəfli görüş keçirilə bilər. Hazırda bu görüş üçün üç fərqli məkan nəzərdən keçirilir və onlardan biri də Alyaskadır.
Xatırladaq ki, Tramp daha əvvəl avqustun 15-də Putinlə Alyaskada görüşəcəyini açıqlamışdı. Rusiya Prezidentinin köməkçisi Yuri Uşakov da bu planı təsdiqləyərək, görüşün əsas mövzusunun Ukrayna münaqişəsinin uzunmüddətli sülh yolu ilə həlli variantları olacağını bildirmişdi.
