BAKI, AzerVoice, Səməd Əyyubov
Ukrayna prezidenti Volodimir Zelenski ABŞ prezidenti Donald Trampla telefon danışığı zamanı Rusiya ilə bağlı yeni təklifləri müzakirə edərək Donbasın tam şəkildə Rusiyaya verilməsinin mümkün olmadığını bildirib.
AzerVoice-un məlumatına görə, telefon danışığı təxminən bir saat yarım davam edib.
Tramp, Alyaskada Rusiya Prezidenti Vladimir Putinlə keçirdiyi sammitin nəticələri barədə Zelenskiyə məlumat verərək Moskvanın cəbhə xəttinin dondurulması müqabilində Ukrayna ordusunun Donbasdan çıxarılmasını təklif etdiyini söyləyib. Məlumata görə, Zelenski bu şərti qəbul etməyib və bildirib ki “bu, mümkün deyil.”
"Reuters" agentliyi isə Zelenskinin bu tələbi birbaşa rədd etdiyini yazır.
Qeyd edək ki "The Washington Post" nəşrinin yazdığına görə, Trampın Zelenski və Avropa liderləri ilə apardığı danışıqlar, sammitdən əvvəlki məsləhətləşmələrlə müqayisədə daha gərgin keçib.
"The New York Times" nəşri isə qeyd edir ki, Tramp Putinlə görüşdən sonra Avropa liderlərinə Rusiya-Ukrayna münaqişəsinin həlli üçün plan təqdim edib. Plan Donbasın tam şəkildə Rusiyaya verilməsini, o cümlədən hələ də Rusiya ordusunun nəzarətində olmayan ərazilərin də təslim edilməsini nəzərdə tutur. Mənbələrin bildirdiyinə görə, Tramp bu yolla sürətli sülh sazişinə nail olmağın mümkün olduğunu düşünür. Təklifə əsasən, Ukrayna Donbası Rusiyaya verdiyi təqdirdə atəşkəs mövcud cəbhə xəttində qüvvəyə minəcək və həm Kiyev, həm də Avropa üçün təhlükəsizlik zəmanətləri təmin olunacaq.
Xatırladaq ki, Alyaskanın Ankoric şəhərində yerləşən “Elmendorf-Riçardson” hərbi bazasında iki liderin məhdud formatda görüşü baş tutub. Görüşdə Rusiya tərəfini Prezidentin köməkçisi Yuri Uşakov və xarici işlər naziri Sergey Lavrov, ABŞ tərəfini isə dövlət katibi Marko Rubio və Prezidentin xüsusi nümayəndəsi Stiven Uitkoff təmsil edib. Liderlər əvvəlcə qısa söhbət aparıb, daha sonra “üçə-üç” formatında əsas müzakirələrə keçiblər. Görüşdən sonra dövlət başçıları birgə mətbuat konfransında çıxış ediblər. Hər iki lider danışıqları müsbət qiymətləndirmişdi.
