BAKI, AzerVoice, Nərmin Ağayeva
2024-cü il humanitar işçilərin ən çox öldürüldüyü il kimi tarixə düşüb.
AzerVoice xəbər verir ki, BMT-nin Humanitar Məsələlər üzrə Koordinasiya Ofisi (UNOCHA) ötən il 383 humanitar işçinin öldürüldüyünü açıqlayıb ki, bu da indiyədək qeydə alınmış ən yüksək göstəricidir.
UNOCHA-nın 19 avqust Ümumdünya Humanitar Yardım Günü ilə bağlı yaydığı bəyanatda, humanitar işçilərə qarşı zorakılığın əvvəlki illə müqayisədə 31 faiz artdığı vurğulanıb. Ölənlərin əksəriyyətinin öz icmalarına xidmət edən yerli işçilər olduğu, onların vəzifə başında və ya evlərində hücuma məruz qaldıqları bildirilib. Bəyanata görə, 2024-cü ildə 308 yardımçı yaralanıb, 125 nəfər qaçırılıb, 45 nəfər isə nəzarətə götürülüb.
Məlumatda 181 yardım işçisinin Qəzzada, 60-nın isə Sudandakı qarşıdurmalar nəticəsində həlak olduğu qeyd edilib. 2025-ci ilin ilk səkkiz ayında da bu tendensiyanın davam etdiyi, avqustun 14-nə qədər 265 humanitar işçinin öldürüldüyü açıqlanıb.
Qeyd edək ki, BMT Təhlükəsizlik Şurası 2024-cü ilin mayında qəbul etdiyi 2730 saylı qətnamə ilə münaqişə tərəflərini və üzv dövlətləri humanitar işçilərin qorunması öhdəliyini yerinə yetirməyə çağırıb. BMT rəsmiləri isə məsuliyyətin təmin olunmamasını beynəlxalq laqeydliyin göstəricisi adlandıraraq, günahkarların cəzalandırılmasını tələb ediblər.
