BAKI, AzerVoice, Nərmin Ağayeva
Venesuela Prezidenti Nikolas Maduro ABŞ-ın Karib dənizinə hərbi qüvvələr göndərmə qərarına cavab olaraq, ölkəsinə hərbi müdaxilənin mümkün olmadığını bəyan edib.
AzerVoice xəbər verir ki, hərbi forma geyinərək Karakasın Makarao rayonunda keçirilən 2-ci İnqilab Xüsusi Əməliyyatlar Kursunun bağlanış mərasimində çıxış edən Prezident Nikolas Maduro, ABŞ Prezidenti Donald Trampın “narkotik kartelləri ilə mübarizə” bəhanəsi ilə Karib dənizinə hərbi birləşmələr göndərmə qərarını sərt şəkildə tənqid edib.
Maduro, “Onların Venesuelaya girməsinin heç bir yolu yoxdur. Birləşmiş Millətlər Təşkilatının Nizamnaməsinə zidd olan bu mühasirə, təqib və qeyri-qanuni təhdidlər bizim gücümüzü artırır,” - deyə bildirib.
O, ölkəsinin müdafiə planlarını gücləndirdiklərini vurğulayaraq, “Bütün şəxsi heyəti, milli milisləri və ictimaiyyəti məlumatlandırın. 20 günlük fasiləsiz mühasirədən sonra biz dünənkindən daha güclüyük. Daha çox milli və beynəlxalq dəstəyimiz var,” – deyə əlavə edib. Maduro həmçinin Kolumbiya Prezidenti Qustavo Petroya təşəkkür edərək, Kolumbiyanın Katatumbo bölgəsinə 25 minlik qüvvə göndərməsi qərarını alqışlayıb və “Venesuela və Kolumbiya sülh içində birləşib, torpaqlarımızı qoruyur,” – ifadəsini işlədib.
Tədbirdə Maduronu müdafiə naziri Vladimir Padrino Lopez və yüksək rütbəli hərbi komandirlər müşayiət edib. ABŞ-ın Karib dənizinə bir sualtı qayıq və yeddi döyüş gəmisindən ibarət dəniz qrupu göndərdiyi, eləcə də 4000 dəniz piyadasının bölgəyə yerləşdirildiyi bildirilir.
Qeyd edək ki, ABŞ və Venesuela arasında gərginlik son illərdə, xüsusilə ABŞ-ın Venesuelaya tətbiq etdiyi iqtisadi sanksiyalar və siyasi təzyiqlər səbəbindən kəskinləşib. Trampın “narkotik kartelləri ilə mübarizə” adı altında hərbi qüvvələri Karib dənizinə göndərməsi qərarı bu gərginliyi daha da artırıb. Maduro isə ölkəsinin suverenliyini və ərazi bütövlüyünü qorumaqda qətiyyətli olduğunu dəfələrlə bəyan edib.
