BAKI, AzerVoice, Nərmin Ağayeva
İsrailin baş naziri Benyamin Netanyahu HƏMAS ilə məhbus mübadiləsi danışıqlarına qayıtması üçün yaxın ətrafı və yüksək səviyyəli rəsmilər tərəfindən ciddi təzyiqlərlə üzləşir.
AzerVoice xəbər verir ki, İsrail mediasının yaydığı məlumatlara görə, Netanyahu Qəzzaya quru hücumlarına başlamazdan əvvəl HƏMAS ilə məhbus mübadiləsi razılaşmasına razılıq verməsi üçün təzyiq altında olduğunu bildirib. Yüksək səviyyəli rəsmilər Netanyahuya xəbərdarlıq edərək, əgər ordu Qəzzaya quru qoşunları ilə daxil olarsa, danışıqlar üçün heç bir imkanın qalmayacağını vurğulayıblar.
Mənbələrə görə, Netanyahu əvvəllər təsdiq etdiyi planı indi rədd edir və bu, hətta onun yaxın ətrafında belə “təəccüblü inkişaf” kimi qiymətləndirilir. HƏMAS isə Misir və Qətərin atəşkəs və əsir mübadiləsi təklifini qəbul etsə də, İsrail hələ buna cavab verməyib. HƏMAS müharibənin dayandırılması, İsrail ordusunun Qəzzadan çıxarılması və fələstinli məhbusların azad edilməsi müqabilində israilli məhbusları sərbəst buraxmağa hazır olduğunu dəfələrlə bəyan edib.
Müxalifət və məhbus ailələri isə Netanyahunu hakimiyyətdə qalmaq üçün danışıqları qəsdən sabotaj etməkdə ittiham edir. Təl-Əviv hökuməti Qəzzada 50 israilli məhbusun olduğunu, onlardan təxminən 20-nin sağ olduğunu güman edir. İsrail Təhlükəsizlik Kabineti Qəzzanın şimalının işğalı planını təsdiqləsə də, ordunun sentyabrdan əvvəl bu planı həyata keçirməyəcəyi gözlənilir. Plana əsasən, təxminən 1 milyon fələstinli cənuba köçürüləcək, şəhər mühasirəyə alınacaq və intensiv hücumlardan sonra işğal ediləcək.
Qeyd edək ki, Qəzza zolağı 1967-ci ildən 2005-ci ilə qədər İsrailin işğalı altında olub və hazırda 2,3 milyon fələstinlinin yaşadığı bu ərazi 18 ildir ağır blokada şəraitindədir.
