BAKI,AzerVoice

İran, iki aydan artıq davam edən gizlilikdən sonra yeni əməliyyatlar komandanının adını rəsmi şəkildə elan edib.

AzerVoice xəbər verir ki, məlumata görə, general Əli Abdullahiy əməliyyatların yeni rəhbəri təyin olunub. İranın ali rəhbəri Əli Xamenei imzaladığı fərmanla onu Baş Qərargah rəisinin müavini və birgə əməliyyatlar komandanı vəzifəsinə gətirib.

İslam İnqilabı Keşikçiləri Korpusunun (SEPAH) yüksək rütbəli generallarından sayılan Abdullahiy, açıqlamasında silahlı qüvvələrin ölkənin milli təhlükəsizliyi və ərazi bütövlüyünü qorumaq üçün tam hazırlıq vəziyyətində olduğunu bildirib.

“Ordumuz son müharibədən əvvəlkindən daha güclü və hazırdır.”-deyə SEPAH açıqlamasında bildirilir.

İsrail mənbələrinin məlumatına görə, Abdullahiynin təyinatı əslində 2 iyulda reallaşdırılıb.

Xatırladaq ki, əvvəlki əməliyyatlar komandanı, general Qülam Əli Rəşid, İsrailin 13 iyunda başlatdığı hücumun ilk saatlarında həlak olmuşdu. Onun yerinə gətirilən general Əli Şadmani isə müharibənin dördüncü günündə həyatını itirmişdi.

Beləliklə, 12 gün davam edən müharibənin ardından İran hərbi rəhbərliyində ciddi dəyişikliklər baş verib və Abdullahiyin təyinatı ilə əməliyyatlar rəhbərliyi rəsmən bərpa olunub.