BAKI, AzerVoice, Nailə Babazadə
Birləşmiş Millətlər Təşkilatının Təhlükəsizlik Şurası tərəfindən 2015-ci il nüvə sazişi çərçivəsində ləğv edilmiş İrana qarşı beynəlxalq sanksiyalar, İngiltərə, Fransa və Almaniyanın (E3) "snapback" mexanizmini işə salması ilə yenidən qüvvəyə minib.
AzerVoice xəbər verir ki, BMT Təhlükəsizlik Şurasının 2231 saylı qətnaməsi çərçivəsində nəzərdə tutulan və tərəflərdən biri tərəfindən işə salındıqda avtomatik tətbiq edilən "snapback" mexanizmi, razılıq əldə olunmaması səbəbindən 30 günlük prosedur müddətinin sonunda gecə yarısından etibarən aktivləşib.
Bu qərarla birlikdə, indiyədək ABŞ və Avropa ölkələrinin tətbiq etdiyi tək tərəfli sanksiyalar artıq bütün BMT üzvü ölkələr üçün məcburi beynəlxalq sanksiyalara çevrilib. Bura İranın silah alqı-satqısı, raket proqramı və maliyyə əməliyyatlarına dair qadağalar daxildir.
ABŞ Dövlət katibi Marko Rubio məsələ ilə bağlı açıqlamasında, İran rəhbərliyini “yaxşı niyyətlə birbaşa danışıqları qəbul etməyə” çağırıb. O, həmçinin BMT üzvü ölkələri sanksiyaları dərhal tətbiq etməyə və İran rəhbərliyinə beynəlxalq təhlükəsizlik naminə təzyiq göstərməyə çağırıb.
İngiltərə, Fransa və Almaniyanın xarici işlər nazirləri verdikləri birgə bəyanatda, "İranın heç vaxt nüvə silahına sahib olmamasını təmin edəcək yeni diplomatik həll yolları axtarmağa davam edəcəklərini" bildiriblər. Eyni zamanda, Tehrana gərginliyi artıracaq addımlardan çəkinməsi çağırışı da edilib.
İrana qarşı sanksiyaların qarşısını almaq üçün BMT Təhlükəsizlik Şurasında bir neçə təşəbbüs göstərilsə də, nəticə əldə olunmayıb. Cənubi Koreya tərəfindən təqdim edilən və sanksiyaların yumşaldılmasını təklif edən qətnamə 19 sentyabrda səs çoxluğu ilə rədd edilib.
Bundan sonra Çin və Rusiya tərəfindən təqdim edilən və sanksiyaların 6 ay təxirə salınmasını istəyən ikinci layihə də 26 sentyabrda qəbul olunmayıb.
