BAKI, AzerVoice, Nailə Babazadə
Avropa İttifaqının Xarici Siyasət və Təhlükəsizlik üzrə Ali Nümayəndəsi Kaja Kallas Qəzzada atəşkəs planının ilk mərhələsinin təsdiqlənməsini “əhəmiyyətli diplomatik uğur” və “gerçək bir fürsət” kimi qiymətləndirib və Aİ-nin bu prosesi dəstəkləməyə hazır olduğunu bir daha vurğulayıb.
AzerVoice xəbər verir ki, Kallas, atəşkəs planının ilk mərhələsinin qəbulundan sonra ABŞ mənşəli X sosial media platformasında paylaşım edərək bunun vacib bir irəliləyiş olduğunu bildirib.
“Bu, dağıdıcı müharibəyə son qoymaq və bütün girovların azad olunması üçün əsl fürsət olmaqla yanaşı, mühüm diplomatik nailiyyətdir,” – deyə Kallas qeyd edib.
O, həmçinin Avropa İttifaqının razılaşmanın icrasını dəstəkləmək üçün əlindən gələni edəcəyini təsdiqləyib.
Qeyd edək ki, ABŞ Prezidenti Donald Tramp İsraillə Həmasın Qəzzada atəşkəs planının ilk mərhələsini təsdiqlədiyini açıqlayıb. Tramp bu razılaşma çərçivəsində bütün girovların azad ediləcəyini və İsrailin əvvəldən müəyyən edilmiş xəttə geri çəkiləcəyini bəyan edib.
