BAKI, AzerVoice, Orxan Qədirzadə
Cənubi Afrika polisi Rusiyanın hərbi qüvvələrinə qoşulmaq niyyətində olduqları şübhə edilən dörd nəfəri Yohannesburq hava limanında saxlayıb. AzerVoice xəbər verir ki, Polis bildirib ki, şübhəlilər cümə günü təyyarəyə giriş qapısında dayanarkən müəyyən olunub və onların Rusiyaya hərbi xidmətə cəlb edildikləri ehtimal edilir.
Hadisə, bir neçə həftə əvvəl Ukraynada muzdlu qüvvələrə qoşulduqları iddia olunan daha 17 Cənubi Afrika vətəndaşının ölkəyə qaytarılması üçün aparılan səylər fonunda baş verib. Yerli qanunvericiliyə görə vətəndaşların xarici hökumətlərə hərbi yardım göstərməsi və ya icazə olmadan digər ölkələrin ordusunda xidmət etməsi qadağandır.
Polisin “Hawks” adlı xüsusi bölməsi bildirib ki, saxlanılma hava limanı polisi tərəfindən verilmiş məlumat əsasında həyata keçirilib. İlkin araşdırmalar zamanı Cənubi Afrika vətəndaşı olan bir qadının həmin şəxslərin Rusiyaya səfər və işə qəbul prosesini təşkil etdiyi ehtimalı müəyyən edilib.
Məlumata görə, saxlanılan dörd nəfər xarici hərbi yardımın tənzimlənməsi haqqında qanunu pozmaqda şübhəli bilinir və bazar ertəsi məhkəmə qarşısına çıxarılacaq.
Cənubi Afrika Prezidenti Siril Ramafosa, Ukraynada döyüşlərdə iştirak edən 17 vətəndaşın ölkəyə necə aparıldığını müəyyən etmək və onların geri qaytarılmasını sürətləndirmək üçün araşdırma başlanılması barədə göstəriş verib.
Polis həmçinin ölkənin keçmiş prezidenti Yakob Zumanın qızı Duduzile Zuma-Sambuldanın da həmin işdə rolunun olub-olmamasını araşdıracağını bildirib. Zuma-Sambulda parlamentdən cümə günü istefa verib, lakin irəli sürülən ittihamlara münasibət bildirməyib.
