BAKI, AzerVoice, Orxan Qədirzadə
ABŞ-ın xüsusi təyinatlı qüvvələri Venesuela ilə əlaqələndirilən, Rusiya bayrağı altında üzən “Marinera” neft tankerini Atlantik okeanında ələ keçirib. ABŞ-ın Avropa Komandanlığı tankerə nəzarətin ABŞ sanksiyalarının pozulması iddiası ilə götürüldüyünü bildirib.
AzerVoice xəbər verir ki, tanker daha əvvəl “Bella-1” adı ilə tanınıb və ABŞ tərəfi onu sanksiyalardan yayınmaqda istifadə edilən “kölgə donanması”nın tərkib hissəsi kimi təqdim edir. ABŞ rəsmiləri bildiriblər ki, tanker Venesuelaya gedib-gələn sanksiyalı gəmilərə qarşı dəniz məhdudiyyətlərini yarıb və Sahil Mühafizəsinin göyərtəyə çıxmaq cəhdlərini rədd edib.
ABŞ-ın müharibə naziri Pit Heqset sosial şəbəkədə sanksiyalı Venesuela neftinin hərəkətinin qarşısının alınmasına yönələn tədbirlərin “tam qüvvədə” olduğunu yazıb.
Rusiya Nəqliyyat Nazirliyi bəyan edib ki, tankerin ələ keçirilməsi dəniz hüququnun pozulmasıdır və 1982-ci il BMT Dəniz Hüququ Konvensiyasına əsasən açıq dənizdə üzmə azadlığı qüvvədədir. Nazirlik, həmçinin tankerlə əlaqənin ABŞ dəniz qüvvələri göyərtəyə çıxdıqdan sonra itirildiyini açıqlayıb.
Gəmi izləmə məlumatları tankerin İslandiyanın xüsusi iqtisadi zonasına yaxınlaşdığını göstərib. Eyni vaxtda bölgədə Rusiya sualtı qayığı və hərbi gəmisi olduğu bildirilsə də, tərəflər arasında toqquşma əlaməti qeydə alınmayıb.
ABŞ daxili təhlükəsizlik naziri Kristi Noem ayrıca açıqlamada ikinci bir gəminin – “M Sofiya” supertankerinin Karib hövzəsi yaxınlığında beynəlxalq sularda ələ keçirildiyini bildirib. Məlumata görə, bu tanker Panama bayrağı altında üzür və ABŞ sanksiyaları altındadır; o, bu ay Venesuela sularından çıxıb və Venesuela neftini Asiyaya daşıyan gəmilər qrupunun tərkibində göstərilib.
Xatırladaq ki, ABŞ Prezidenti Donald Tramp Venesuela ilə bağlı sanksiyalı neftin ABŞ-a verilməsi barədə açıqlamalar səsləndirib və Venesuelanın ABŞ-a 30–50 milyon barel neft ötürəcəyini bildirib.
