BAKI, AzerVoice, Orxan Qədirzadə
Qrenlandiya hökuməti ABŞ Prezidenti Donald Trampın açıqlamalarına cavab olaraq bəyanat yayıb və Birləşmiş Ştatların adanı istənilən formada nəzarətə götürmək niyyətini qəti şəkildə qəbul etmədiyini bildirib.
AzerVoice-un məlumatına görə bəyanatda vurğulanır ki, Qrenlandiya Danimarka Krallığının tərkib hissəsidir və NATO-da məhz Danimarka birliyinin elementi kimi təmsil olunur. Ada rəhbərliyi qeyd edib ki, Qrenlandiyanın müdafiəsi yalnız NATO çərçivəsində həyata keçirilə bilər və bu məsələ üzrə bütün alyans ölkələrinin, o cümlədən ABŞ-ın ortaq maraqları mövcuddur.
Qrenlandiya hakimiyyəti bildirib ki, ölkənin təhlükəsizlik siyasəti üzrə əsas tərəfdaşı Danimarkadır və hakim koalisiya müdafiə məsələlərində dialoqu NATO daxilində əməkdaşlıq formatında inkişaf etdirmək niyyətindədir. Bəyanatda Qrenlandiyanın gələcəkdə də Qərb müdafiə alyansının ayrılmaz hissəsi olaraq qalacağına əminlik ifadə olunub.
Qrenlandiyanın mövqeyi Avropa İttifaqı tərəfindən dəstəklənib. Aİ-nin müdafiə və kosmos üzrə komissarı bildirib ki, ABŞ-ın Qrenlandiyanı hərbi yolla nəzarətə götürməsi NATO-nun faktiki sonu və transatlantik münasibətlərə ağır zərbə olardı.
Onun sözlərinə görə, Danimarka belə bir müraciətlə çıxış edərsə, Avropa İttifaqı Qrenlandiyanın təhlükəsizliyinin təmin olunmasında kömək göstərməyə hazırdır. Bu yardım hərbi qüvvələrin və müvafiq infrastrukturun yerləşdirilməsini də əhatə edə bilər.
Komissar vurğulayıb ki, belə bir ssenari yalnız alyans üçün deyil, eyni zamanda Qrenlandiya əhalisi üçün də son dərəcə mənfi nəticələr doğurardı.
Daha əvvəl Donald Tramp Qrenlandiyaya sahib olmağın onun üçün “psixoloji baxımdan vacib” olduğunu bildirmişdi. O, razılaşmaların vermədiyi imkanları yalnız birbaşa nəzarətin təmin edə biləcəyini iddia etmiş, adada ABŞ-ın hərbi mövcudluğunun artırıla biləcəyini istisna etməmişdi.
Tramp həmçinin demişdi ki, əgər ABŞ Qrenlandiyanı “ələ keçirməsə”, bunu Rusiya və ya Çin edə bilər və o, buna imkan verməyəcək.
Bu arada Almaniyanın keçmiş vitse-kansleri Robert Habek Qrenlandiyaya Avropa İttifaqı üzvlüyünün təklif olunması ideyasını irəli sürüb. Onun fikrincə, ada ətrafında satınalma və ya hətta işğal müzakirələri fonunda Avropa öz alternativ təşəbbüsünü ortaya qoymalıdır.
Habek mərhələli üzvlük modeli, infrastruktur yatırımları, eləcə də Qrenlandiyanın yerli mədəniyyətinin və özünüidarəetməsinin qorunmasına zəmanət verilməsini mümkün variantlar kimi qeyd edib.
