BAKI,VOA
İran hökuməti çərşənbə axşamı verdiyi bəyanatda diplomatiyaya müharibədən daha çox üstünlük verdiyini, lakin hər iki varianta hazır olduğunu vurğulayıb. Tehran bəyan edib ki, regionda hər hansı bir "yanlış hesablamanın" qarşısını almaq üçün əlindəki bütün çəkindirmə vasitələrini işə salacaq.
Hökumət sözçüsü Fatimə Mühacirani həftə sonundan bəri İran universitetlərində yenidən alovlanan etirazlara ilk rəsmi reaksiyasını verib. O, tələbələrin etiraz etmək hüququnun olduğunu qəbul etsə də, "qırmızı xətlərin" keçilməməsi barədə xəbərdarlıq edib: "Müqəddəs dəyərlər və dövlət bayrağı qorumalı olduğumuz qırmızı xətlərdir. Hətta qəzəbin ən yüksək nöqtəsində belə onlardan kənara çıxmaq olmaz".
Şahidlərin verdiyi məlumata və sosial şəbəkələrdə yayılan görüntülərə görə, paytaxt Tehranın müxtəlif universitetlərində hökumət əleyhinə aksiyalar keçirilir. Bu iğtişaşlar ABŞ-ın regionda hərbi yığnağı artırdığı və mümkün hücum planlarının müzakirə edildiyi həssas bir dövrə təsadüf edir.
Cenevrə danışıqları və Trampın təzyiqi
Gələn cümə axşamı Cenevrədə ABŞ və İran rəsmiləri arasında nüvə proqramı ilə bağlı yeni raund danışıqların keçirilməsi planlaşdırılır. Omanın xarici işlər naziri Bədr əl-Busaidi "X" platformasında bildirib ki, tərəflər razılığa nail olmaq məqsədilə əlavə addım atmaq üçün müsbət niyyət nümayiş etdirirlər.
Lakin bu danışıqlar ABŞ Prezidenti Donald Trampın Tehrana qarşı hərbi zərbə endirə biləcəyi ilə bağlı artan narahatlıqlar fonunda keçirilir. Tramp bazar ertəsi verdiyi bəyanatda ABŞ Qərargah Rəisləri Komitəsinin İrana qarşı böyük əməliyyatın riskləri barədə xəbərdarlıq etməsi ilə bağlı xəbərləri təkzib edib. O, Vaşinqtonun istənilən münaqişədə Tehranı "asanlıqla" məğlub edə biləcəyini iddia edib.
Ağ Ev daxilindəki fikir ayrılıqları
"Axios" portalının məlumatına görə, Trampın xüsusi elçisi Stiv Vitkoff və kürəkəni Cared Kuşner prezidenti hazırkı mərhədə zərbə endirməməyə, diplomatiyaya şans verməyə çağırırlar. Lakin Tramp bəzi media qurumlarını qəsdən yalan məlumat yaymaqda ittiham edib.
Trampın sözləri kəskin olub: "Qərarı mən verirəm. Razılaşma əldə olunmasına üstünlük verirəm, lakin razılıq olmasa, bu, həmin ölkə üçün çox pis, xalqı üçün isə çox bədbəxt bir gün olacaq". Prezident 2018-ci ildə çıxdığı nüvə sazişinin yerinə yeni bir alternativ tapılmasa, hərbi tədbirlərin qaçılmaz olacağını dəfələrlə təkrar edib.
Hazırda Vaşinqton Yaxın Şərqə nəhəng hərbi qüvvə yerləşdirib. Buraya iki aviadaşıyıcı qrup, ondan çox gəmi və çox sayda qırıcı təyyarə daxildir.
