BAKI,VOA,Yusif Şərifzadə
Çin Xarici İşlər naziri Van İ İranın Ali Milli Təhlükəsizlik Şurası katibinin müavini Qədir Nezami ilə görüş keçirib.
VOA xəbər verir ki, görüş Hindistanın Yeni Dehli şəhərində keçirilən BRİKS toplantısı çərçivəsində baş tutub.
Çin XİN-in məlumatına görə, Van İ ABŞ və İran arasında əldə olunan 14 bəndlik çərçivə sazişini “bərabərlik ruhuna əsaslanan” bir sənəd kimi qiymətləndirib.
O bildirib ki, saziş BMT Nizamnaməsinin məqsədlərinə uyğun gəlir və beynəlxalq münasibətlər normalarına əsaslanır.
Van İ qeyd edib ki, razılaşmanın icrası əldə olunmuş atəşkəsin möhkəmləndirilməsinə, ABŞ-İran münasibətlərinin yaxşılaşmasına və Yaxın Şərqdə sülhün bərpasına töhfə verə bilər.
Çinli nazir vurğulayıb ki, Pekin İranın “suverenliyini, təhlükəsizliyini və milli ləyaqətini” qəti şəkildə dəstəkləyir.
O əlavə edib ki, Çin İranla hərtərəfli strateji tərəfdaş kimi ədalətli və obyektiv mövqe sərgiləyir və sülhə yönəlmiş bütün təşəbbüsləri dəstəkləyir.
Van İ həmçinin İranın Körfəz ölkələri və regiondakı digər dövlətlərlə münasibətləri yaxşılaşdırmaq səylərini müsbət qiymətləndirib.
Qədir Nezami isə Pekinin siyasi dəstəyinə görə təşəkkür edib.
