BAKI,VOA,Yusif Şərifzadə
Portuqaliya hökuməti ölkədə isti hava şəraitinin davam etməsi və meşə yanğınları riskinin artması səbəbindən Avropa İttifaqı, İspaniya və Mərakeşdən əlavə yanğınsöndürmə təyyarələrinin hazır vəziyyətdə saxlanılmasını xahiş edib.
VOA xəbər verir ki, Portuqaliyanın Baş naziri Luiş Monteneqru bildirib ki, bu qərar ölkədə resurs çatışmazlığı ilə deyil, yaxın günlərdə gözlənilən fövqəladə hava şəraiti ilə əlaqədardır.
Onun sözlərinə görə, qarşıdakı günlərdə ölkənin bütün ərazisində meşə yanğınları təhlükəsi çox yüksək qiymətləndirilir.
Baş nazir qeyd edib ki, hökumət Avropa İttifaqının Mülki Müdafiə Mexanizmini, eləcə də İspaniya və Mərakeşlə ikitərəfli əməkdaşlıq mexanizmlərini işə salıb. Məqsəd ölkənin müxtəlif bölgələrində fəaliyyət göstərən milli qüvvələri başqa ərazilərdən çıxarmadan əlavə dəstək almaqdır.
Milli Meteorologiya Xidmətinin məlumatına görə, Portuqaliyanın bir sıra bölgələrində qırmızı hava xəbərdarlığı elan olunub və bəzi rayonlarda havanın temperaturu 40 dərəcəni ötüb.
Hazırda ölkədə bazar ertəsi gününün sonunadək xüsusi hazırlıq rejimi qüvvədədir. Bu müddətdə bəzi meşə ərazilərinə giriş məhdudlaşdırılıb, meşə təsərrüfatı texnikasından istifadəyə və kənd təsərrüfatı sahələrində nəzarətli ot yandırılmasına qadağa qoyulub.
Mülki müdafiə qurumlarının məlumatına əsasən, hazırda Portuqaliyada altı meşə yanğınının söndürülməsinə 2 800-dən çox yanğınsöndürən, 864 texnika və 32 təyyarə cəlb olunub. Ən iri yanğın ölkənin Vizeu bölgəsində qeydə alınıb.
