BAKI,VOA,Yusif Şərifzadə

Hörmüz boğazında Yunanıstana məxsus iki neft tankerinin mərmilərlə vurulduğu bildirilib. Gəmilərdən birində yanğın baş verdikdən sonra heyət təxliyə olunub.

VOA xəbər verir ki, Birləşmiş Krallığın Dəniz Ticarət Əməliyyatları İdarəsi (UKMTO) Hörmüz boğazında iki neft tankerinə hücum barədə məlumat yayıb. Hadisələrdən biri Yunanıstanın “Dynacom Tankers” şirkətinə məxsus, Malta bayrağı altında üzən “Kavomaleas” tankerində baş verib.

Məlumata görə, gəmidə yanğın qeydə alındıqdan sonra heyət təhlükəsizlik məqsədilə tankeri tərk edib. Ekipaj üzvləri yaxınlıqdakı yedək gəmisi tərəfindən xilas edilib.

UKMTO bildirib ki, yanğın Oman sahilləri yaxınlığında, Kuzmarın şimalında yerləşən ərazidə baş verib. Hadisə zamanı tanker bir müddət Səudiyyə Ərəbistanı sahilləri yaxınlığında dənizdə dayanmış vəziyyətdə olub.

Məlumata əsasən, tanker iyulun 2-də Hörmüz boğazından çıxmağa çalışıb, lakin gəminin avtomatik identifikasiya sistemi (AIS) söndürülüb.

Hücumun kim tərəfindən həyata keçirildiyi hələlik müəyyən edilməyib. Hörmüz boğazında artan gərginlik fonunda gəmiçilik təhlükəsizliyi ilə bağlı narahatlıqlar güclənir.