BAKI,VOA,Yusif Şərifzadə

Pakistan Yəməndə fəaliyyət göstərən husi hərəkatının Səudiyyə Ərəbistanına qarşı təhdidlərini qətiyyətlə pisləyib və bu addımların bölgədə gərginliyi daha da artıra biləcəyini bəyan edib.

VOA xəbər verir ki, Pakistan Xarici İşlər Nazirliyinin yaydığı bəyanatda husilərin Səudiyyə Ərəbistanına və Qırmızı dənizdə ticarət gəmilərinə qarşı davam edən təhdidlərinin qəbuledilməz olduğu bildirilib.

Bəyanatda qeyd olunub ki, bu cür addımlar regional təhlükəsizliyi təhdid edir, dənizdə sərbəst gəmiçiliyə zərbə vurur, beynəlxalq dəniz nizamını sarsıdır və qlobal ticarətin fasiləsiz fəaliyyətini risk altına salır.

Pakistan tərəfi husilərin tətbiq etdiyi dəniz blokadasının Səudiyyə Ərəbistanından neft idxal edən ölkələrə də mənfi təsir göstərə biləcəyini vurğulayıb.

İslamabad eyni zamanda Səudiyyə Ərəbistanını Yaxın Şərqdə davam edən qarşıdurmaya cəlb etmək cəhdlərindən ciddi narahatlığını ifadə edib.

Bəyanatda Pakistanın qardaş ölkə kimi Səudiyyə Ərəbistanının təhlükəsizliyini, suverenliyini, ərazi bütövlüyünü və rifahını qətiyyətlə dəstəklədiyi bir daha təsdiqlənib.

Pakistan və Səudiyyə Ərəbistanı uzun illərdir təhlükəsizlik və müdafiə sahəsində sıx əməkdaşlıq edən strateji tərəfdaşlar hesab olunur.