BAKI,VOA,Yusif Şərifzadə
Çin Qırmızı dənizin cənub hissəsində yerləşən Bab əl-Məndəb boğazından tankerlərinin təhlükəsiz keçidini təmin etmək məqsədilə Yəməndə fəaliyyət göstərən husi hərəkatı ilə birbaşa danışıqlar aparıb. Bu barədə məsələdən məlumatlı altı mənbə Reuters agentliyinə bildirib.
VOA xəbər verir ki, mənbələrin sözlərinə görə, Çin husilərdən öz tankerlərinə hücum edilməyəcəyinə dair təminat istəyib. Danışıqlarda iştirak edən mənbələr arasında yüksək vəzifəli İran rəsmisinin də olduğu bildirilir.
Məlumata əsasən, Çin husilərlə Bab əl-Məndəb boğazından keçidlə bağlı birbaşa əlaqə quran ilk ölkələrdən biri olub. Mənbələr qeyd ediblər ki, Pekin Səudiyyə Ərəbistanının əsasən Yanbu limanından həyata keçirdiyi neft ixracının davam etməsində maraqlıdır. Bu addımın İranın Hörmüz boğazını faktiki olaraq bağlaması nəticəsində yaranan tədarük çatışmazlığını qismən kompensasiya etmək məqsədi daşıdığı bildirilir.
Reuters-in məlumatına görə, husilər iyulun 20-də Səudiyyə Ərəbistanı limanlarına qarşı dəniz blokadası elan etdikdən sonra azı dörd tanker Səudiyyə limanlarından Çinə istiqamətlənərək Bab əl-Məndəb boğazından keçib.
Mənbələrin bildirdiyinə görə, Çin rəsmiləri hər bir gəmi üçün husilərdən ayrıca razılıq alıblar. İki regional rəsminin sözlərinə əsasən, həm Çin, həm də husilər bu proses barədə İranı da məlumatlandırıblar.
Husilər beynəlxalq gəmiçilik şirkətlərinə göndərdikləri elektron məktubda Səudiyyə Ərəbistanı limanlarında yük yükləyən və ya boşaldan gəmilərin hücuma məruz qala biləcəyi barədə xəbərdarlıq ediblər. Təhlükəsizlik narahatlıqları səbəbindən bəzi tankerlərin Bab əl-Məndəb boğazına daxil olmadan marşrutlarını dəyişdirdiyi də bildirilir.
Çinin Nəqliyyat Nazirliyi, husilərin media ofisi və İran Xarici İşlər Nazirliyi Reuters-in şərh sorğusuna hələlik cavab verməyib.
