BAKI,VOA,Yusif Şərifzadə

İtaliya və ABŞ iyulun 31-də süni intellekt təchizat zəncirlərinin təhlükəsizliyini gücləndirməyi hədəfləyən Pax Silica təşəbbüsü çərçivəsində əməkdaşlıq sazişi imzalayacaqlar.

VOA xəbər verir ki, İtaliya Xarici İşlər Nazirliyinin yaydığı bəyanata əsasən, sazişi İtaliyanın səfiri Armando Varrikkio və ABŞ-ın İtaliyadakı səfiri Tilman Fertitta ölkənin cənubundakı Brindizi şəhərində imzalayacaqlar.

Pax Silica ABŞ Dövlət Departamentinin təşəbbüsüdür və müttəfiq ölkələri süni intellekt sahəsində təchizat zəncirlərinin təhlükəsizliyini təmin etmək məqsədilə bir araya gətirir. Təşəbbüs yarımkeçiricilər, kritik minerallar, qabaqcıl istehsal texnologiyaları və süni intellekt modelləri kimi strateji sahələri əhatə edir.

İtaliyanın təşəbbüsə iyun ayında Mayamidə qoşulması planlaşdırılırdı. Lakin xarici işlər naziri Antonio Tayani səfəri ləğv etmişdi. Buna səbəb Baş nazir Corcia Meloni ilə ABŞ Prezidenti Donald Tramp arasında yaşanan açıq fikir ayrılığı və Vaşinqtonun Romanı İranla bağlı müharibə zamanı kifayət qədər dəstək verməməkdə ittiham etməsi olmuşdu.

İtaliya Xarici İşlər Nazirliyi bildirib ki, sazişin əsas məqsədi bu strateji sahələrin inkişafını dəstəkləyən ekosistem yaratmaq və kritik məhsulların ixracatçısı olan ölkələrdən asılılığı azaltmaqdır.