BAKI, AzerVoice
OpenAI İlon Maska qarşı iddia qaldırıb.
AzerVoice xəbər verir ki, süni
intellekt texnologiyaları sahəsində aparıcı şirkətlərdən biri olan
OpenAI, onun həmtəsisçilərindən biri olan və hazırda SpaceX və
Tesla-nın rəhbəri olan İlon Maska qarşı məhkəmə iddiası
qaldırıb.
Şirkət Maska, OpenAI-ı öz maraqlarına uyğun yönləndirməyə və
texnoloji nəzarəti ələ keçirməyə çalışmaqda ittiham edir.
OpenAI-nin vəkilləri məhkəməyə təqdim etdikləri sənədlərdə Maskın şirkətə qarşı addımlarını “zərərli” və “missiyanı sarsıtmaq məqsədli” kimi dəyərləndiriblər. Onların fikrincə, Maskın 97,4 milyard dollarlıq satınalma təklifi açıq şəkildə düşməncəsinə ələ keçirmə cəhdidir.
Qeyd edək ki, İlon Mask əvvəllər OpenAI-nin qeyri-kommersiya prinsiplərindən uzaqlaşdığını iddia edərək şirkəti tənqid etmiş, dekabr ayında isə onun daha əvvəl məhz bu struktur dəyişikliyini dəstəklədiyi açıqlanmışdı.
Mask 2025-ci ilin əvvəlində OpenAI-ı almaq üçün 97,4 milyard dollar təklif etsə də, bu təklif rəhbərlik tərəfindən səmimi olmayan kimi qəbul edilərək rədd edilib. Mask daha sonra bildirib ki, əgər OpenAI qeyri-kommersiya qurumu kimi qalsa, satınalma iddiasından vaz keçəcək.
OpenAI-nin əks iddiasında isə Maskın əsas məqsədinin şirkətə nəzarəti tam şəkildə ələ keçirmək olduğu vurğulanır. Hüquqi mübahisənin necə nəticələnəcəyi hələlik məlum deyil. Bununla belə, bu qarşıdurmanın süni intellektin gələcəyi və etik sərhədləri baxımından qlobal təsirlərə səbəb ola biləcəyi proqnozlaşdırılır.
