BAKI, AzerVoice
ChatGPT üçün yaddaş funksiyası istifadəyə verilib- fərdiləşdirilmiş süni intellekt dövrü başlayır
AzerVoice xəbər verir ki, süni intellekt nəhəngi OpenAI “ChatGPT” üçün istifadəçi təcrübəsini köklü şəkildə dəyişən yeni funksiyanı – “Yaddaşın Gücləndirilməsi” xüsusiyyətini istifadəyə verib.
Yeni imkan sayəsində ChatGPT istifadəçilərlə keçmiş söhbətləri xatırlayaraq daha ardıcıl, aktual və şəxsə uyğunlaşdırılmış cavablar təqdim edə biləcək. Beləliklə, süni intellekt artıq istifadəçilərin adətləri, üslubu və əvvəlki mövzular əsasında daha təkmil şəkildə reaksiya verəcək.
OpenAI-nin açıqlamasında bildirilir ki, bu funksiya defolt olaraq aktivdir, lakin istifadəçilər istədikləri halda onu deaktiv edə bilərlər. Funksiya ilk olaraq Plus və Pro abunəçilərinə təqdim edilsə də, Avropa İqtisadi Bölgəsi, Böyük Britaniya, İsveçrə, Norveç, İslandiya və Lixtenşteyn kimi bəzi regionlar bu funksiyadan müvəqqəti olaraq istifadə edə bilməyəcəklər.
OpenAI yaxın həftələrdə müəssisə, komanda və təhsil istifadəçilərinə də bu xüsusiyyətin açılacağını bildirib.
Qeyd edək ki, OpenAI yaxın zamanda ChatGPT-yə inteqrasiya etdiyi vizual istehsal funksiyası ilə də diqqət çəkib. Artıq istifadəçilər sadəcə mətnlə deyil, şəkillərlə də sorğular verə, DALL-E-nin imkanlarını birbaşa ChatGPT üzərindən istifadə edə bilərlər. Şirkətin baş direktoru Sem Altman bu marağın OpenAI serverlərinə ciddi yük saldığını və bəzi qrafik prosessorların həddindən artıq yükləndiyini “əriməklə” zarafatla ifadə edib.
Hazırda GPT-4.5 dil modeli ilə işləyən ChatGPT-nin yaxın gələcəkdə yeni “o3” əsaslandırma modeli ilə daha da inkişaf etdirilməsi gözlənilir.
