BAKI, AzerVoice, Nailə Babazadə
Birləşmiş Millətlər Təşkilatının (BMT) Baş katibi Antonio Quterreş Qəzzadaki kövrək atəşkəsin dəfələrlə pozulmasına baxmayaraq, hələ də qüvvədə olduğunu bildirərək ikinci mərhələ danışıqları üçün yolun açılmasına çağırış edib.
AzerVoice xəbər verir ki, Quterreş bu fikirləri Nyu-Yorkdakı BMT Baş Qərargahında Afrika İttifaqı ilə BMT arasında keçirilən yüksək səviyyəli görüşdən sonra Afrika İttifaqı Komissiyasının sədri Mahmud Ali Yussuf ilə birgə mətbuat konfransında səsləndirib.
Qəzzadaki atəşkəs və humanitar yardımların vəziyyəti ilə bağlı sualı cavablandıran Quterreş “Qəzzadaki atəşkəs kövrəkdir, dəfələrlə pozulub, lakin hələ də qüvvədədir.”- deyə açıqlama verib.
“Atəşkəsə tam şəkildə riayət olunması, fələstinlilərin öz müqəddəratını təyin etməsi və iki dövlətli həllin həyata keçirilməsi üçün zəruri şəraitin yaradılmasına yönələcək ikinci mərhələ danışıqlarının başlanması vacibdir.” - deyə Quttereş əlavə edib.
Baş katib həmçinin qeyd edib ki, humanitar yardımların çatdırılması prosesində hələ də aradan qaldırılmamış bəzi maneələr və çətinliklər qalır.
Bununla belə, BMT-nin Qəzzaya göndərdiyi yardımların əhəmiyyətli dərəcədə artdığını vurğulayıb və əlavə edib ki, bundan sonrakı addımlar BMT Təhlükəsizlik Şurasının qərarları ilə müəyyən olunacaq.
