BAKI, AzerVoice, Nailə Babazadə
İran Prezidenti Məsud Pezeşkian bir daha bəyan edib ki, İranın nüvə proqramı yalnız dinc məqsədlərlə həyata keçirilir və ölkənin daxili ehtiyaclarını ödəməyə yönəlib. O, İslam Respublikasının heç vaxt nüvə silahı əldə etməyə çalışmadığını vurğulayıb.
AzerVoice xəbər verir ki, bu açıqlamaları Pezeşkian çərşənbə axşamı Avstriyanın Tehrandakı yeni səfiri Fridrix Ştiftin etimadnamələrinin qəbul mərasimində səsləndirilib.
Prezident bəyan edib ki, bəzi ölkələr əsassız ittihamlar irəli sürərək və geniş təbliğat kampaniyaları apararaq İranın dinc nüvə fəaliyyətlərinə şübhə yaratmağa cəhd göstərirlər. Onun sözlərinə görə, İranın heç vaxt nüvə silahı əldə etməyə səy göstərmədiyi barədə verdiyi təminatlara baxmayaraq, bu kampaniyalar davam edir.
“Bizim nüvə proqramımız tamamilə nüvə enerjisinin dinc tətbiqləri çərçivəsində həyata keçirilir və xalqımızın sağlamlıq, tibb, sənaye, kənd təsərrüfatı, elm və texnologiya sahələrində ehtiyaclarını ödəməyə yönəlib,” – deyə Pezeşkian bildirib.
Prezident həmçinin əlavə edib ki, İranın xarici siyasəti əməkdaşlıq, dostluq, sülh və qarşılıqlı maraqlara əsaslanan əlaqələrin genişləndirilməsi üzərində qurulub.
Avstriya ilə bağlı danışan Pezeşkian bildirib ki, İran onilliklərdir Avropa ölkəsi ilə konstruktiv və hörmətə əsaslanan münasibətlər saxlayır və bütün sahələrdə ikitərəfli əlaqələrin daha da gücləndirilməsinə çalışır.
