BAKI, AzerVoice, Nailə Babazadə
Venesuela Prezidenti Nikolas Maduro paytaxt Karakasda keçirilən Bolivarcı İcma Komandanlarının andiçmə mərasimində çıxışı zamanı rəqs edərək ABŞ-a “sülh” çağırışı edib. Tədbir hakim Birləşmiş Sosialist Partiyası tərəfindən təşkil olunub.
AzerVoice xəbər verir ki, Mərasimdə öz sözlərinin remiks edilmiş versiyasının müşayiəti ilə rəqs edən Maduro, “Müharibə? Qətiyyən yox. Müharibəyə yox, xahiş edirəm sülh olsun”, – deyərək Venezuela hökumətinin gərginlik deyil, dialoq istədiyini bildirib.
Prezident ölkə əhalisinin 94 faizinin “imperialist hərbi təhdidə” qarşı olduğunu vurğulayıb:
“Xalqın 94 faizi hər cür xarici hücumu rədd edir və vətəni müdafiəyə hazır olduğunu bəyan edir.”
Maduro çıxışı zamanı mərhum prezident Uqo Çavesə sədaqət andını da yeniləyib və “lazım gələrsə həyatım bahasına belə sizə sadiq qalacağıma” söz verib. O, son 22 həftədə xalqın psixoloji təzyiqə məruz qaldığını, ordunun və polis qüvvələrinin iştirakı ilə aparılan təlimlərin isə ölkənin müdafiə qabiliyyətini gücləndirdiyini deyib.
Mitinqlə paralel olaraq PSUV üzvləri Karakasın əsas küçələrində yürüş edərək ABŞ-ın Karib hövzəsindəki hərbi fəallığını pisləyən şüarlar səsləndiriblər.
Qeyd edək ki, ABŞ Prezidenti Donald Trampın əvvəlki qərarnaməsinə əsasən Latın Amerikası narkotik kartellərinə qarşı əməliyyatların gücləndirilməsi çərçivəsində ABŞ ordusunun bölgədə iştirakı artırılıb. Bu məqsədlə ABŞ avqust ayında Venesuela sahillərinə sualtı və hərbi gəmilər göndərib.
Müdafiə naziri Pit Hegseth ABŞ ordusunun “rejim dəyişikliyi daxil olmaqla” mümkün əməliyyatlara hazır olduğunu bildirib. Maduro isə cavab olaraq ölkədə 4,5 milyon nəfərlik milis qüvvəsinin səfərbər edildiyini açıqlayıb.
ABŞ hərbi gəmilərinin Venesuela sahillərində narkotik qaçaqmalçılığı iddiası ilə həyata keçirdiyi əməliyyatlar Karakas tərəfindən “beynəlxalq hüquqa zidd” kimi qiymətləndirilir. Eyni zamanda dünyanın ən böyük təyyarədaşıyıcısı olan USS Gerald R. Fordun bölgəyə göndərildiyi də bildirilir.
