BAKI, AzerVoice, Nailə Babazadə
Kanada Ukraynaya 143 milyon dollar məbləğində hərbi yardım göstərəcəyini açıqlayıb.
AzerVoice xəbər verir ki, Kanada Müdafiə Nazirliyinin açıqlamasında bildirilib.
"Kanada, NATO-nun Önəmli Ukrayna Ehtiyacları Siyahısı (PURL) çərçivəsində ABŞ-dan tədarük ediləcək kritik hərbi imkanları əhatə edən paketini alacaq. Kanadanın bu pakətə töhfəsi 200 milyon Kanada dolları (təxminən 143 milyon dollar) olacaq."- deyə açıqlamada bildirilib.
Açıqlamada, Kanadanın bu pakətə verdiyi töhfənin Ukraynaya, NATO müttəfiqlərinə və Avropa-Atlantik regionunun təhlükəsizliyinə sarsılmaz bağlılığını əks etdirdiyi vurğulanıb: "Müttəfiqlərimizlə bu PURL paketinə töhfə verərək Ukraynanın suverenliyini müdafiə etməsi və xalqını qoruması üçün ehtiyacı olan inkişaf etmiş imkanları sürətlə əldə etməsini təmin edirik."
Avqust ayında hazırlanmış satınalma planına görə, digər müttəfiqlərin də qatqısı ilə Ukraynaya ediləcək ümumi hərbi yardım 500 milyon dollar dəyərində olacaq.
Açıqlamaya əsasən, fevral 2022-dən bəri Kanada Ukraynaya verdiyi ümumi yardımın həcmi 22 milyard Kanada dollarına çatıb.
Bu yardım ABŞ Prezidenti Donald Tramp və NATO tərəfindən hazırlanmış Önəmli Ukrayna Ehtiyacları Siyahısı (PURL) planının ardınca həyata keçirilib.
Tramp 11 iyul tarixində açıqlamasında ölkəsinin Ukraynaya silah tədarükünü NATO vasitəsilə həyata keçirmək üçün ittifaqla razılaşdığını və bu silahların xərclərinin NATO tərəfindən ödəniləcəyini bildirmişdi.
