BAKI, AzerVoice, Nailə Babazadə
Meksika Prezidenti Klaudia Şeynbaum ABŞ-ın blokada tətbiq etdiyi Kubaya enerji dəstəyini və humanitar yardımları davam etdirəcəklərini bəyan edib.
AzerVoice xəbər verir ki, Milli Sarayda keçirdiyi gündəlik mətbuat konfransında çıxış edən Şeynbaum Venesueladan enerji sevkiyatı kəsilən və çətin günlər keçirən Kubaya həmrəylik mesajı verib. Meksika lideri ölkəsinin xarici siyasətinin qardaşlıq prinsiplərinə əsaslandığını və Kuba xalqı üçün daha yaxşı şəraitin yaradılmasına hər zaman töhfə verməyə hazır olduqlarını vurğulayıb. O qeyd edib ki Meksikanın göndərdiyi neftin həcmi ümumi hasilatın çox kiçik bir hissəsini təşkil etsə də bu addım mənəvi baxımdan böyük əhəmiyyət kəsb edir.
Meksika Prezidenti bu dəstəyin Meksika xalqının əleyhinə olmadığını və sırf humanitar məqsədlər daşıdığını xüsusi olaraq qeyd edib. Şeynbaumun bu açıqlamaları ilə eyni vaxtda Meksikadan yola düşən və təxminən 86 bin barel yanacaq daşıyan tankerin artıq Kubanın paytaxtı Havana körfəzinə çatdığı bildirilir. Bu yardımın Kubada son vaxtlar yaşanan kəskin enerji qıtlığının aradan qaldırılmasında mühüm rol oynayacağı gözlənilir.
