BAKI, AzerVoice, Nailə Babazadə
İran Prezidenti Məsud Pezeşkian ABŞ ilə müzakirələrin bərpası məqsədilə xarici işlər naziri Abbas Əraqçiyə müvafiq tapşırıq verdiyini açıqlayıb.
AzerVoice xəbər verir ki, Pezeşkian özünün "X" sosial media hesabından mövzu ilə bağlı yazılı bəyanat yayaraq, bu addımın bölgədəki dost dövlətlərin ABŞ Prezidenti Donald Trampın müzakirə təklifinə cavab verilməsi ilə bağlı çağırışları nəzərə alınaraq atıldığını qeyd edib.
Prezident Pezeşkian müzakirələrin şərtlərini açıqlayarkən bildirib ki, uyğun bir mühitin olması, təhdidlərin aradan qaldırılması, qeyri-qanuni və qeyri-məntiqi gözləntilərdən uzaq durulması şərti ilə, "izzət, hikmət və məsləhət" prinsipləri əsasında, habelə milli maraqlar çərçivəsində ədalətli bir danışıqlar zəminin hazırlanması üçün Xarici İşlər Nazirliyi fəaliyyətə başlayıb.
Məlumata görə, ABŞ Prezidenti Donald Trampın Yaxın Şərq üzrə xüsusi nümayəndəsi Stiv Vitkoff ilə İranın xarici işlər naziri Abbas Əraqçi arasında mümkün nüvə sazişini müzakirə etmək üçün 6 fevral cümə günü İstanbulda görüş planlaşdırılır. Bu görüş, 2025-ci ilin iyun ayında İran və İsrail arasında baş verən və 12 gün davam edən hərbi qarşıdurmadan sonra ABŞ və İran rəsmilərinin ilk birbaşa təması olması baxımından böyük əhəmiyyət kəsb edir.
Nazir Əraqçi İran İslam İnqilabının 47-ci ildönümü münasibətilə paytaxt Tehranda Ayətullah Xomeyninin məqbərəsində etdiyi çıxışda ölkəsinin diplomatiyaya hazır olduğunu bir daha təsdiqləyib. Bununla belə, o vurğulayıb ki, diplomatiya təzyiq, qorxu və güc tətbiqi ilə bir araya sığmır. Əraqçi həmçinin bu diplomatik addımların nəticələrinin tezliklə özünü göstərəcəyinə ümid etdiyini bildirib.
