BAKI, AzerVoice, Nailə Babazadə
Kuba hökuməti bazar ertəsi AFP-yə verdiyi açıqlamada ABŞ Prezidenti Donald Tramp administrasiyası ilə "ünsiyyətdə" olduqlarını, lakin rəsmi danışıqların hələ başlamadığını bildirib.
AzerVoice xəbər verir ki, xarici işlər nazirinin müavini Karlos Fernandez de Kossio müsahibəsində qeyd edib ki, hazırda tərəflər arasında tammiqyaslı dialoqdan söz açmaq mümkün olmasa da, iki hökumət arasında müəyyən əlaqə kanalları mövcuddur.
Bu açıqlama Donald Trampın bazar günü verdiyi bəyanatdan sonraya təsadüf edir. Tramp ABŞ-ın Kubanın "ən yüksək səviyyəli rəsmiləri" ilə danışıqlar apardığını və tezliklə bir razılaşma əldə olunacağını gözlədiyini iddia etmişdi. De Kossio isə ölkəsinin humanitar böhranın qarşısını almaq üçün dialoqa hər zaman açıq olduğunu təkrar vurğulayıb.
Yanvarın 3-də ABŞ xüsusi təyinatlılarının Kubanın ən yaxın müttəfiqi və maliyyə dəstəkçisi olan Venesuela lideri Nikolas Maduronu əsir götürməsindən sonra Tramp administrasiyası Havanaya qarşı təzyiqləri kəskinləşdirib. Vaşinqtonun tələbi ilə Venesuelanın yeni rəhbərliyi Kubaya neft daşımalarını dayandırıb.
Prezident Tramp həmçinin bəyan edib ki, Kubanın digər əsas tərəfdaşı olan Meksika da bu ölkəyə neft göndərməyi dayandıracaq. O, Kubaya qarşı tətbiq edilən faktiki blokadadan yayınmağa kömək edən istənilən ölkəyə qarşı gömrük tariflərini artıracağı ilə hədələyib. Meksika tərəfi hələlik bu bəyanata rəsmi reaksiya verməsə də, Prezident Klaudiya Şeynbaum daha əvvəl ölkəsinin tarif riskləri ilə üzləşməsini istəmədiyini etiraf etmişdi.
Tətbiq edilən sanksiyalar və yanacaq çatışmazlığı Kubanı tamamilə qaranlığa qərq etmək təhlükəsi yaradır. Ölkədəki elektrik stansiyaları fəaliyyətini dayandırmaq həddindədir, kənd yerlərində sutkada 20 saata çatan elektrik kəsintiləri müşahidə olunur. Yerli sakinlər humanitar böhranın xəstəxanalara, qida təchizatına və əsas xidmətlərə ciddi təsir göstərdiyini, buna görə də hökumətin danışıqlara getməsinin vacib olduğunu bildirirlər.
Tramp Kubanı "uğursuz dövlət" adlandıraraq, rəsmi Havana ilə razılaşma əldə olunmasına çox yaxın olduqlarını iddia edir. Bu gərginlik həm də ABŞ və Meksika arasında ticarət sazişlərinin yenidən nəzərdən keçirildiyi həssas bir dövrə təsadüf edir.
