BAKI, VOA, Nailə Babazadə
Ukrayna Prezidenti Volodimir Zelenski ABŞ Prezidenti Donald Tramp ilə müharibənin dayandırılması istiqamətində davam edən səyləri müzakirə etdiklərini bildirib.
VOA xəbər verir ki, bu barədə Zelenski sosial media hesabındakı paylaşımında Tramp ilə telefon danışığı apardığını qeyd edib.
Telefon danışığında ABŞ-ın Yaxın Şərq üzrə xüsusi nümayəndəsi Stiv Vitkoffun, Trampın kürəkəni və keçmiş baş müşaviri Cared Kuşnerin də iştirak etdiyini vurğulayan Zelenski, Vitkoff və Kuşnerin bu gün İsveçrənin Cenevrə şəhərində Ukrayna Milli Təhlükəsizlik və Müdafiə Şurasının katibi Rüstəm Umerov ilə görüşəcəklərini xatırladıb.
Tramp ilə söhbəti zamanı Cenevrede keçiriləcək ikitərəfli görüşlər və martın əvvəlində Rusiya, Ukrayna və ABŞ-ın iştirakı ilə planlaşdırılan üçtərəfli danışıqların yeni mərhələsinə hazırlıq məsələlərini danışdıqlarını qeyd edən Zelenski, "Bunun liderlər səviyyəsində danışıqlara keçmək üçün bir fürsət yaradacağına ümid edirik," – deyə bildirib.
Trampın müharibənin sona çatdırılması üçün görülən bu işləri dəstəklədiyini deyən Zelenski, "Bütün çətin və həssas məsələləri həll etməyin və nəhayət müharibəni bitirməyin tək yolu budur," – deyə qiymətləndirmə aparıb.
Zelenski, həmçinin Rusiyanın hücumları səbəbindən Ukraynanın ağır qış mövsümü keçirdiyini qeyd edərək, Tramp ilə görüşündə hava hücumundan müdafiə sistemləri üçün raketlərin tədarükü məsələsini də müzakirə etdiklərini bildirib.
