BAKI, VOA, Nailə Babazadə
Çərşənbə axşamı günü ABŞ-İsrail koalisiyasının İrana qarşı hava hücumlarının miqyası daha da genişlənib. Tehranın Körfəz ölkələrinə və Kiprdəki Britaniya hərbi hava bazasına raket və dron zərbələri endirməsi, həmçinin İsrailin "Hizbullah"ın hücumlarına cavab olaraq Livanı hədəf alması münaqişəni yeni və daha təhlükəli mərhələyə daşıyıb.
VOA xəbər verir ki, ABŞ Prezidenti Donald Tramp Ər-Riyaddakı ABŞ səfirliyini hədəf alan hücuma "tezliklə" cavab veriləcəyini təsdiqləyib. Səudiyyə Ərəbistanı Müdafiə Nazirliyinin məlumatına görə, səfirlik iki PUA ilə hücuma məruz qalıb, nəticədə məhdud yanğın və bəzi maddi zərərlər yaranıb. Vaşinqton bu hücumu cavabsız qoymayacağını bəyan edib.
Prezident Tramp hazırkı mərhələdə İranda quru qoşunlarının yerləşdirilməsinin zəruri olacağına inanmadığını bildirib. İsrailin Baş naziri Benyamin Netanyahu isə İranla münaqişənin "sonsuz müharibə" olmayacağını vurğulayıb. Bununla belə, Netanyahu əməliyyatların tam nəticə verməsi üçün müəyyən vaxtın tələb olunacağını qeyd edib.
