BAKI, VOA, Nailə Babazadə
Avropa Birliyi (AB) Komisyonu 2026-cı il üçün Fələstin, Livan, Suriya, İordaniya və Misirdəki humanitar böhranların aradan qaldırılması məqsədilə təxminən 458 milyon avro məbləğində yardım paketini təsdiqlədiyini açıqlayıb.
VOA xəbər verir ki, komissiyanın yazılı bəyanatında bəzi böyük donorların regiondan çəkilməsi və beynəlxalq humanitar hüququn ciddi təzyiq altında olması fonunda bu dəstəyin kritik əhəmiyyət kəsb etdiyi vurğulanıb. Yardım paketinin ən böyük hissəsi — 210 milyon avro Suriyadakı təcili müdaxilə və mühafizə tədbirlərinə yönəldiləcək.
Suriya üçün ayrılan vəsait ölkə daxilində qida yardımı, səhiyyə xidmətləri, sığınacaq, təmiz su təminatı və təhsildən kənarda qalan uşaqların məktəbə cəlb edilməsi kimi sahələri əhatə edəcək. Fələstin üçün ayrılmış 124 milyon avroluq resurs isə əsasən ərzaq təhlükəsizliyi və tibbi xidmətlərin yaxşılaşdırılması üçün istifadə olunacaq. Eyni zamanda, intensiv hərbi zərbələrdən zərər çəkən Livanın təcili səhiyyə və sığınacaq ehtiyaclarını qarşılamaq üçün 100 milyon avro vəsait nəzərdə tutulub.
Regional dəstək proqramı çərçivəsində İordaniyaya 15,5 milyon avro, Misirə isə 8 milyon avro ayrılıb. Bu vəsaitlər düşərgələrdə yaşayan qaçqınların fundamental ehtiyaclarının ödənilməsi və ən həssas qrupların sosial müdafiəsinin gücləndirilməsinə sərf ediləcək. AB Komissiyası bildirib ki, bu humanitar maliyyələşmə həm də regionda baş verə biləcək təbii fəlakətlərə hazırlıq və təhsil proqramlarının kəsintisiz davam etdirilməsini təmin etmək məqsədi daşıyır.
