BAKI,VOA, Nailə Babazadə
ABŞ Prezidenti Donald Tramp İranın razılaşma ilə bağlı son cavabının mühüm bir irəliləyiş olduğunu qeyd edərək bildirib: "Mənə qalsa, İrandakı nefti əlimizdə saxlamaq istərdim, çünki o, orada götürülməyə hazırdır. Təəssüf ki, Amerika xalqı bizim evə dönməyimizi istəyir".
VOA xəbər verir ki, Prezident Tramp mətbuat mənsublarının İran gündəminə dair suallarını cavablandırıb. O, imkan daxilində İranın neftini ələ keçirməyi hədəfləyəcəyini vurğulayaraq deyib: "Mənə qalsa, nefti götürərdim, əlimdə saxlayardım və bolca pul qazanardım".
ABŞ və İran arasındakı mümkün razılaşma prosesinin müsbət istiqamətdə irəlilədiyini və İranın amerikalılara verdiyi son cavabların əhəmiyyətli olduğunu bildirən Tramp, "Nələrin baş verəcəyini görəcəyik" deyib. Digər tərəfdən, Tramp İrandakı nümayişçilərə bölgədəki kürd qrupları vasitəsilə çox sayda silah göndərdiklərini, lakin bu silahların mənzil başına çatmadığını qeyd edib.
Tramp bu mövzuda belə danışıb: "(İranlılara) bir az silah göndərdik, bunlar İran xalqına çatmalı idi. Lakin silahları çatdırdığımız şəxslər (bölgədəki kürd qrupları) silahları özlərinə saxladılar. Bəzi insanlara çox qəzəbliyəm və bunun bədəlini ağır ödəyəcəklər". O, iddia edib ki, əgər İran xalqının əlində silah olsaydı, ölkə "iki saniyə içində təslim olardı".
Prezident həmçinin İranın ABŞ-a məxsus iki F-15 qırıcısını vurub salmasını "təsadüf" adlandırıb. Tramp vurğulayıb ki, qırıcılardan bir deyil, hər iki pilot yaralı halda xilas edilib və vəziyyətləri yaxşıdır: "Pilotlardan birini açıqlamadıq, çünki onu ələ keçirdiyimizi bilsəydilər... Buna görə gizli saxladıq".
