BAKI,VOA, Nailə Babazadə
ABŞ Prezidenti Donald Tramp "New York Post" qəzetinə verdiyi eksklüziv müsahibədə, Pakistanın paytaxtı İslamabadda keçiriləcək danışıqlardan nəticə hasil olmasa, İrana qarşı genişmiqyaslı hərbi əməliyyatlara başlayacaqlarını bəyan edib.
VOA xəbər verir ki,Tramp ABŞ hərbi gəmilərinin hazırda ən müasir silah-sursatla yenidən təchiz edildiyini bildirib.
Prezident müsahibəsində hərbi hazırlıqların miqyasını vurğulayaraq deyib: "Hazırda gəmilərimizi indiyə qədər hazırlanmış ən yaxşı döyüş sursatları və silahlarla yükləyirik. Bu silahlar əvvəl istifadə etdiklərimizdən də qat-qat üstündür. Əgər bir razılaşma əldə olunmasa, biz onlardan istifadə edəcəyik və bu, çox effektiv olacaq". Tramp həmçinin özünə məxsus "Truth Social" platformasında "DÜNYANIN ƏN GÜCLÜ RESETİ!!!" (WORLD'S MOST POWERFUL RESET!!!) ifadəsini paylaşaraq hərbi və siyasi gedişatın miqyasına işarə edib.
Bu həftəsonu İslamadadda keçiriləcək kritik danışıqlara rəhbərlik etmək üçün vitse-prezident JD Vance artıq Pakistana yola düşüb. Vance nümayəndə heyətinə rəhbərlik edərək Tehranın qarşısında ABŞ-ın şərtlərini qoyacaq. O, İslamabada getməzdən əvvəl verdiyi bəyanatda İranı Vaşinqtonla "oyun oynamamağa" çağırıb və danışıqların gərgin atmosferdə keçəcəyinin mesajını verib.
İslamabadda baş tutacaq bu görüşlər son aylar ərzində bölgədə davam edən hərbi gərginliyi və İsraili də əhatə edən atəşkəs prosesini tənzimləmək üçün son şans kimi qiymətləndirilir. Lakin Tramp-ın "hərbi reset" hədəsi göstərir ki, ABŞ diplomatiya masasında hərbi güc kartından maksimum dərəcədə istifadə etmək niyyətindədir.
