BAKI,VOA, Nailə Babazadə
ABŞ Prezidenti Donald Tramp "Bloomberg" agentliyinə verdiyi telefon müsahibəsində İranla bağlı gərginliyin gələcək taleyinə toxunaraq, 7 apreldə elan olunmuş iki həftəlik müvəqqəti atəşkəsin müddətinin uzadılma ehtimalının "olduqca aşağı" olduğunu bildirib.
VOA xəbər verir ki, prezidentin sözlərinə görə, atəşkəsin müddəti Vaşinqton vaxtı ilə çərşənbə günü axşam başa çatır. O qeyd edib ki, əgər həmin vaxta qədər tərəflər arasında yekun saziş əldə olunmasa, hərbi əməliyyatların bərpası qaçılmaz ola bilər: "Pis razılaşma əldə etmək üçün tələsməyəcəyəm. Əgər saziş imzalanmasa, döyüşlərin yenidən başlamasını gözləyirəm".
Tramp bildirib ki, vitse-prezident Ceyms Devid Vens (JD Vance) müzakirələri davam etdirmək üçün bu gün yenidən Pakistana yola düşəcək. Müzakirələrin yeni raundunun çərşənbə axşamı İslamabadda başlaması planlaşdırılır. Qeyd edək ki, İran tərəfi hələlik bu görüşlərdə iştirak edəcəyini rəsmən təsdiqləməsə də, diplomatik kanallarla təkliflərin nəzərdən keçirildiyi bildirilir.
İran tərəfinin əsas tələbi olan Hörmüz boğazındakı dəniz blokadasının qaldırılmasına münasibət bildirən Tramp, mövqeyinin qəti olduğunu vurğulayıb. "İranlılar boğazın açılmasını çox istəyirlər, lakin saziş imzalanana qədər blokada tam gücü ilə davam edəcək," – deyə o əlavə edib.
Xatırladaq ki, aprelin 13-dən bəri ABŞ donanması tərəfindən tətbiq olunan bu blokada nəticəsində onlarla gəminin İran limanlarına girişi və çıxışı qadağan edilib. Tramp həmçinin xəbərdarlıq edib ki, diplomatik səylər nəticə verməzsə, ABŞ İranın enerji infrastrukturu və strateji körpülərini hədəf almağa hazırdır.
