BAKI, AzerVoice
Fələstin ərazilərində, o cümlədən Qəzza zolağında bir il ərzində ümumi prezident və parlament seçkiləri keçiriləcək.
AzerVoice xəbər verir ki, bu barədə Bağdadda keçirilmiş Ərəb Dövlətləri Liqasının 34-cü sammitinin yekununda qəbul edilən bəyanatda qeyd olunub.
“Xalq öz qanuni nümayəndələrini yalnız demokratik seçkilər vasitəsilə seçə bilər. Buna görə də ümumi prezident və parlament seçkiləri bir il ərzində bütün Fələstin ərazilərində — Qəzza zolağı, İordan çayının qərb sahili və Şərqi Qüds daxil olmaqla — keçiriləcək. Bunun üçün zəruri şəraitin yaradılmasını xahiş edirik” - deyə, sənəddə bildirilib.
Fələstin Prezidenti də bu müddət ərzində ümumi seçkilərin keçirilməsinə hazır olduğunu təsdiqləyib.
