BAKI, AzerVoice
Qəzzada onkoloji xəstələr üçün həyati təhlükə dərinləşir.
AzerVoice xəbər verir ki, İsrailin səhiyyə infrastrukturlarını hədəfə alması Qəzzada minlərlə xərçəng xəstəsini kritik vəziyyətə salıb.
İsrailin Fələstin-Türkiyə Dostluq Xəstəxanasını bombalaması, Qəzza-Avropa Xəstəxanası və Qəzza Xərçəng Mərkəzinin boşaldılması nəticəsində hazırda bölgədə xərçəng xəstələri müalicə almaqda ciddi çətinliklərlə üzləşirlər. Qəzzada 11 min onkoloji xəstənin müalicə aldığı mərkəzlərin tək-tək sıradan çıxarılması ilə tibbi xidmətlər iflic olub. Ən çox müraciət olunan Nasser Xəstəxanasında dərman və avadanlıq çatışmazlığı səbəbilə xəstələrə yalnız məhdud yardım göstərilir.
Qəzza Xərçəng Mərkəzinin direktoru Məhəmməd Əbu Neda bildirib ki, radioterapiya xidmətlərinin olmaması, dərmanların 64 faizinin tükənməsi və xəstələrin çoxunun çadırlarda, ağır şəraitdə yaşaması vəziyyəti daha da çətinləşdirir. Onun sözlərinə görə, hər gün orta hesabla iki xərçəng xəstəsi müalicə çatışmazlığından həyatını itirir. Müalicə üçün xaricə getməsi nəzərdə tutulan 5 min xəstə isə Rəfah keçidinin bağlı olması səbəbilə Qəzzanı tərk edə bilmir.
Kimyaterapiyası yarımçıq qalan xəstələrdən biri olan Hiba Əhməd bildirib ki, müalicədən sonra düzgün qidalanma çox vacibdir, lakin Qəzzada nə yemək, nə də içməli su var. Digər xəstə Məhəmməd Əbu Asi isə dərman çatışmazlığından kimyaterapiyanı üç həftə gecikmə ilə ala bildiyini, artıq xəstəliyin son mərhələsində olduğunu deyib.
Qeyd edək ki, 2023-cü ildən etibarən Qəzzadakı səhiyyə sistemi ciddi zərbələr alıb. Regiona tətbiq olunan blokada və müharibə səbəbilə səhiyyə resursları tükənib, xərçəng xəstələri isə həm xəstəlik, həm də münaqişənin ağır nəticələri ilə mübarizə aparmaq məcburiyyətində qalıblar.
