BAKI, AzerVoice,Nailə Babazadə
Türkiyə Prezidentinin Administrasiyası nəzdində İctimaiyyətlə Əlaqələr İdarəsinin rəhbəri Burhanəddin Duran, Azərbaycan ilə Ermənistan arasında imzalanan sülh bəyannaməsini dəyərləndirərək, “Bu, Cənubi Qafqazda davamlı sülh üçün mühüm mərhələdir və bu təşəbbüsü məmnuniyyətlə qarşılayırıq” – deyə bildirib.
AzerVoice xəbər verir ki, Duran sosial media hesabında paylaşdığı açıqlamada, Azərbaycan Prezidenti İlham Əliyev və Ermənistan Baş naziri Nikol Paşinyanın ABŞ Prezidenti Donald Trampın vasitəçiliyi ilə imzaladığı sənədin bölgədə sabitliyin təmin olunması yolunda mühüm addım olduğunu vurğulayıb.Burhanəddin Duran, Türkiyə Prezidenti Rəcəb Tayyib Ərdoğanın kritik mərhələlərdə Azərbaycana verdiyi strateji dəstəyə də diqqət çəkib.
“İkinci Qarabağ Müharibəsindən sonra açılan sülh fürsəti pəncərəsi, prezidentimiz Ərdoğanın yürütdüyü regional diplomatiya sayəsində Azərbaycan və Ermənistan arasında dialoqu gücləndirib və bu günə gəlinməsində mühüm rol oynayıb.” - deyə Duran qeyd edib.
Duran əlavə edib ki, Ermənistan, sülh və diplomatiyanın müharibə və gərginlikdən daha faydalı olduğunu anlayaraq, təzyiqlərə baxmayaraq sülhdən yana mövqe tutub.
Duran açıqlamasının sonunda bildirib ki, “Türkiyə, əvvəllər olduğu kimi, bundan sonra da bölgədə davamlı sabitliyin və əmin-amanlığın təmin olunması, bu prosesin qalıcı sülhə çevrilməsi üçün Prezidentimizin liderliyində diplomatik səylərini davam etdirəcək, konstruktiv təşəbbüsləri dəstəkləyəcək və tərəflərlə sıx təmasda olmağa davam edəcək.”- deyə qeyd edib.
