BAKI, AzerVoice, Nailə Babazadə
Türkiyənin xarici işlər naziri Hakan Fidan bildirib ki, Ankara Ermənistanla münasibətlərin normallaşdırılması məsələsində siyasətini dəfələrlə elan edib və bu mövqeyə sadiqdir. Onun sözlərinə görə, Azərbaycan və Ermənistan arasında yekun sülh sazişi imzalandığı zaman Türkiyə Ermənistanla normallaşmaya başlamağa hazır olacaq. Fidan qeyd edib ki, Ermənistanın bölgədə sülhə bu qədər maraqlı olmasının əsas səbəbi Türkiyənin münasibətləri normallaşdırmağa hazır olduğunu görməsidir.
AzerVoice xəbər verir ki, Fidan açıqlamasını TBMM-in Plan və Büdcə Komitəsində, Xarici İşlər Nazirliyinin 2026-cı il büdcəsi müzakirə edilərkən millət vəkillərinin suallarını cavablandırarkən verib.
Hakan Fidan Ermənistanla normallaşma məsələsinə yenidən toxunaraq bildirib ki, sərhədlərin açılması və iqtisadi əlaqələrin canlanması Ermənistan üçün böyük əhəmiyyət daşıyır. Nazir deyib ki, regionda yeni bir “donmuş münaqişə” vəziyyətinin yaranmasını istəmirlər. Onun fikrincə, münasibətlər sülh sazişi imzalanmadan tam normallaşdırılarsa, Ermənistanın Azərbaycanla razılaşma imzalama motivasiyası zəifləyə bilər.
Fidan iki ölkənin Vaşinqtonda sənəd parafladığını, lakin razılaşdırılmamış iki məsələ qaldığını bildirib. Bunlardan biri Zəngəzur dəhlizi, digəri isə Ermənistan Konstitusiyası ilə bağlı bəzi müddəalardır. Nazir qeyd edib ki, bu məsələlər həll olunarsa və Azərbaycan yekun sənədə imza atarsa, Türkiyə də Ermənistanla sərhəd qapılarını açacaq.
Zəngəzur dəhlizi barədə danışan Fidan bildirib ki, dəhlizlə bağlı tələbi irəli sürən Azərbaycan tərəfidir və birləşdirilməsi nəzərdə tutulan ərazi Naxçıvanla Azərbaycan arasındadır. Türkiyənin burada tərəflərə asanlaşdırıcı rol oynadığını, hazırda isə region ölkələri ilə ticarəti əsasən Gürcüstan və İran üzərindən həyata keçirdiklərini söyləyib.
