BAKI, AzerVoice, Orxan Qədirzadə

Bakı Təşəbbüs Qrupunun fəaliyyəti kolonial və neokolonial siyasətlərə qarşı beynəlxalq müstəvidə real nəticələr verməyə başlayıb.

AzerVoice xəbər verir ki, Bakı Təşəbbüs Qrupunun icraçı direktoru Abbas Abbasov jurnalistlərə açıqlamasında bildirib ki, Azərbaycana qarşı ikili standart tətbiq edən təşkilatlar obyektiv mövqe formalaşdırmaq üçün ilk növbədə öz ölkələrində mövcud olan ədalətsizliklərə diqqət yetirməlidirlər. Onun sözlərinə görə, bu yanaşma daha balanslı və ədalətli mövqenin ortaya çıxmasına xidmət edər.

Abbas Abbasov qeyd edib ki, Bakı Təşəbbüs Qrupunun fəaliyyəti artıq konkret və ölçülə bilən nəticələr verir. O vurğulayıb ki, kolonial və neokolonial siyasətlərə qarşı aparılan mübarizə beynəlxalq dəstək qazanıb və dekolonizasiya prosesinə mühüm töhfələr verilib.

BTQ-nin icraçı direktoru əlavə edib ki, təşkilat yerli xalqların hüquqlarının qorunması sahəsində, o cümlədən Yeni Kaledoniya və digər dənizaşırı ərazilərlə bağlı bir sıra mühüm nailiyyətlər əldə edib. Onun sözlərinə görə, bu istiqamətdə beynəlxalq diqqətin artırılması məqsədilə yeni tədbirlər və nəşrlər planlaşdırılır.

Abbas Abbasov vurğulayıb ki, artıq Bakı Təşəbbüs Qrupu beynəlxalq siyasətdə nüfuz qazanan qeyri-hökumət təşkilatına çevrilib və bundan sonra da insan hüquqlarının müdafiəsi, yerli xalqların hüquqlarının qorunması və dekolonizasiya prosesinin təşviqi istiqamətində fəaliyyətini davam etdirəcək.