Səudiyyə Ərəbistanı 2026-cı ilin ikinci rübündə 9018 investisiya lisenziyası verib ki, bu da ötən ilin eyni dövrü ilə müqayisədə 252 faizlik kəskin artım deməkdir.
Səudiyyə Ərəbistanı İnvestisiya Nazirliyinin "İqtisadi və İnvestisiya İcmalı: Səudiyyə Ərəbistanı 2-ci Rüb 2026" adlı yeni hesabatında qeyd olunur ki, 2026-cı ilin ikinci rübündə verilən icazələr əsasən topdansatış və pərakəndə ticarət, tikinti və istehsal sektorlarında cəmləşib; bu üç sahə rüb ərzində verilmiş ümumi lisenziyaların təxminən 66 faizini təşkil edib.
Bu sıçrayış Səudiyyə Ərəbistanının 2019–2030-cu illər arasında ümumi investisiya səviyyəsini üç dəfə artırmağı, birbaşa xarici investisiyaları isə 2030-cu ilə qədər 20 dəfədən çox artıraraq 388 milyard Səudiyyə riyalı (103.5 milyard dollar) səviyyəsinə çatdırmağı hədəfləyən Milli İnvestisiya Strategiyası fonunda baş verir.
Strategiya həmçinin investisiyaların ümumi daxili məhsuldakı (ÜDM) payını 2019-cu ildəki 22 faizdən 2030-cu ilə qədər 30 faizə yüksəltməyi hədəfləyir. Xüsusi əhəmiyyət kəsb edən prioritet sektorlar sırasına yaşıl enerji, texnologiya, səhiyyə, biotexnologiya, qabaqcıl mobillik və logistika daxildir.
"Bu artım investorların etimadının yüksəldiyini və Krallığın investisiya mühitinin davamlı cəlbediciliyini təsdiqləyir, həmçinin Səudiyyə Ərəbistanını aparıcı investisiya məkanına çevirmək üzrə 'Səudiyyə Vizyonu 2030' hədəflərini irəli aparır".-deyə hesabatda qeyd olunur.
İnvestisiya mühitini inkişaf etdirmək və investorların təcrübəsini təkmilləşdirmək istiqamətindəki davamlı səylər çərçivəsində İnvestisiya Nazirliyi 2026-cı ilin ikinci rübündə "Vahid Pəncərə" mərkəzi vasitəsilə 26 mindən çox, regional mərkəzlər vasitəsilə 83 mindən çox və rəsmi internet saytı vasitəsilə 70 mindən çox xidmət göstərib.
Hesabatda həmçinin göstərilir ki, nazirlik Səudiyyə Ərəbistanında və xaricdə ixtisaslaşmış tədbirlər və investisiya forumları təşkil etməklə və onlarda iştirak etməklə daxili investisiyaları təşviq etmək və xarici kapitalı cəlb etmək səylərini davam etdirib.
İkinci rüb ərzində nazirlik müxtəlif investisiya sahələri üzrə yerli və beynəlxalq tədbirlərdə, o cümlədən Krallığı tərəfdaş ölkələrlə birləşdirən forumlarda və investorlarla əsas maraqlı tərəfləri bir araya gətirən qlobal toplantılarda iştirak edib.
"Bu səylər nazirliyin investisiya mühitini inkişaf etdirmək, perspektivli imkanları işıqlandırmaq, yerli investisiyaları təşviq etmək və Səudiyyə Ərəbistanı Krallığının güclü tərəflərini və fərqlənən investisiya potensialını nümayiş etdirərək xarici investisiyaları cəlb etmək öhdəliyini əks etdirir".-deyə açıqlamada bildirilir.
Hesabatda həmçinin qeyd edilib ki, nazirlik investisiya qaydalarını və prosedurlarını təkmilləşdirmək, ölkənin qanunvericilik və tənzimləyici bazasını gücləndirmək üçün müvafiq dövlət qurumları ilə əməkdaşlıq edərək təhlükəsiz və rəqabətədavamlı investisiya mühitinin yaradılmasına köklənib.
Həmin investisiya qanunları və normativ aktları investisiya mühitinin yaxşılaşdırılmasında və Səudiyyə Ərəbistanına kapital cəlb edilməsində mühüm rol oynayır.
