Səudiyyə Ərəbistanında milli "Ehsan" xeyriyyə platformasının müstəqil qeyri-kommersiya fonduna çevrilməsini və onun Qəyyumlar Şurasının təyin edilməsini nəzərdə tutan iki kral fərmanı imzalanıb.
Birinci fərmana əsasən, platforma xeyriyyəçilik fəaliyyətini gücləndirmək, ianəçiləri ehtiyac sahibləri ilə əlaqələndirmək məqsədi daşıyan müstəqil qeyri-kommersiya təşkilatına - "Ehsan" Xeyriyyə Fonduna çevriləcək. Fond həmçinin fərdlərin və şirkətlərin ianə etməsinə şərait yaradacaq, Krallığın qeyri-kommersiya sektorunun səmərəliliyini artırmaq üçün dövlət və özəl sektor qurumları ilə birgə işləyəcək.
İkinci kral fərmanı ilə fondun Qəyyumlar Şurasının tərkibi müddəti uzadıla bilən üç il üçün təsdiqlənib. Şuraya Ticarət naziri Məcid əl-Qəsəbi sədrlik edəcək, İnsan Resursları və Sosial İnkişaf naziri Əhməd ər-Raci isə sədr müavini vəzifəsini icra edəcək.
Əl-Qəsəbi bu addımın "Ehsan"ın inkişafında yeni mərhələ olduğunu, Səudiyyə Ərəbistanının qeyri-kommersiya sektoru genişləndikcə təşkilata daha böyük səlahiyyətlər və çeviklik bəxş etdiyini bildirib. O əlavə edib ki, bu transformasiya təşkilatın sektordakı dəyişikliklərə daha yaxşı cavab verməsinə və "Səudiyyə Vizyonu 2030"un səmərəliliyi artırmaq, sosial və iqtisadi təsiri genişləndirmək hədəflərini irəli aparmağa kömək edəcək. Əl-Qəsəbi fondu xeyriyyəçilik təşəbbüslərini dəstəkləyən, yardımların yüksək şəffaflıq və etibarlılıq standartları ilə həqiqi ehtiyac sahiblərinə çatmasını təmin edən milli çətir təşkilat kimi xarakterizə edib.
Qəyyumlar Şurasına həmçinin Səudiyyə Məlumat və Süni İntellekt İdarəsinin (SDAIA) rəhbəri doktor Abdullah əl-Qəmdi, Vəqflər Baş İdarəsinin sədri İmad bin Saleh əl-Xəraşi, Əbdürrəhman bin İbrahim ər-Ruvəytə, Ədib bin Abdullah əz-Zamil, şahzadə Nuf bint Məhəmməd bin Abdullah bin Məhəmməd əl-Əbdürrəhman, doktor Əbdürrəhman bin Əbdülmöhsün əl-Xələf və İmad bin Əbdülqadir əl-Muhəydib daxil edilib.
Bu qərar 2021-ci ildə kral sərəncamı ilə SDAIA-ya platformanı yaratmaq tapşırığı verildikdən sonra fəaliyyətə başlayan "Ehsan" üçün yeni inkişaf səhifəsidir. "Ehsan" ianələrin sosial, dini, təhsil, qida, mənzil və səhiyyə proqramları üzrə həqiqi ehtiyac sahiblərinə çatmasını təmin edən rəqəmsal idarəetmə sistemi kimi dizayn edilmişdi.
Beş ildən artıq fəaliyyəti dövründə platforma ümumi dəyəri 17 milyard Səudiyyə riyalı (4.53 milyard dollar) olan 440 milyondan çox ianə əməliyyatını emal edib.
Qeyri-kommersiya sektorunda çalışanlar üçün "Ehsan"ın inkişafı xeyriyyə təşkilatlarının ianəçilərlə əlaqə qurma tərzini də tamamilə dəyişib.
Yeni struktur fonda "Ehsan"ın xidmətlərini inkişaf etdirməyə, ianələrlə məşğul olan qeyri-kommersiya proqramlarını və platformalarını dəstəkləməyə, eləcə də xeyriyyə və inkişaf layihələrində istifadə olunan texniki infrastrukturun koordinasiyasına kömək etməyə imkan verəcək.
