BAKI,VOA, Fərid Mikayılov
Türkiyə Prezidenti Rəcəb Tayyib Ərdoğan İstanbul Texniki Universitetinin rektorluğuna bağlı akademik bölmələrin Azərbaycan Respublikasının Qarabağ Universitetinin nəzdində açılması ilə bağlı qərar imzalayıb.
VOA xəbər verir ki, Türkiyə Prezidentinin 11647 nömrəli qərarı avqustun 26-da imzalanıb və avqustun 27-də “Resmi Gazete”nin 33353-cü sayında dərc olunub. Təqdim edilən sənəddə qərarın nömrəsi, tarixi və Prezident Rəcəb Tayyib Ərdoğanın imzası göstərilir.
Qərar İstanbul Texniki Universitetinin rektorluğuna bağlı akademik bölmələrin Azərbaycanın Qarabağ Universitetinin nəzdində yaradılmasını nəzərdə tutur. Türkiyənin avqustun 27-də dərc olunan rəsmi qərarlar siyahısında da 11647 nömrəli sənəd məhz bu adla yer alıb.
Beləliklə, Türkiyənin aparıcı ali təhsil müəssisələrindən olan İstanbul Texniki Universitetinin akademik imkanlarının Qarabağ Universitetində təmsil olunması üçün hüquqi əsas yaradılıb.
Qərar Azərbaycan və Türkiyə arasında ali təhsil sahəsində əməkdaşlığın, xüsusilə Qarabağ Universitetinin beynəlxalq akademik əlaqələrinin genişləndirilməsi baxımından diqqət çəkir.
İstanbul Texniki Universitetinə bağlı hansı konkret akademik bölmələrin Qarabağ Universitetində fəaliyyət göstərəcəyi barədə təqdim edilən bir səhifəlik sənəddə əlavə məlumat yer almır.
