Suriya Prezidenti Əhməd əş-Şəraa BMT-nin Qaçqınlar üzrə ali komissarı Bərham Salehi Dəməşqdə qəbul edib. Görüşdə qaçqınların könüllü, təhlükəsiz, ləyaqətli və davamlı şəkildə geri qayıtmasının təmin edilməsi, həmçinin ölkənin erkən bərpası və yaşayış imkanlarının yaradılması məsələləri müzakirə olunub.
Suriya Xəbər Agentliyinin (SANA) məlumatına görə, görüş Dəməşqdəki Xalq Sarayında keçirilib. Görüşdə Suriya xarici işlər və xaricdə yaşayanlarla əlaqələr naziri Əsəd Həsən əş-Şeybani də iştirak edib.
Tərəflər Suriya hökuməti ilə BMT-nin Qaçqınlar üzrə Ali Komissarlığı (UNHCR) arasında əməkdaşlığın gücləndirilməsi yollarını müzakirə ediblər.
“Düşərgəsiz Suriya” təşəbbüsü müzakirə olunub
Bərham Saleh bundan əvvəl “Düşərgəsiz Suriya” strategiyasının həyata keçirilməsinə cavabdeh olan Suriya rəhbər komitəsi ilə görüşüb.
Görüşdə birgə koordinasiya mexanizmləri, əməkdaşlığın perspektivləri və strategiyanın ölkənin bərpası prosesində rolu nəzərdən keçirilib.
“Düşərgəsiz Suriya” təşəbbüsünün əsas məqsədlərindən biri məcburi köçkünlərin könüllü, təhlükəsiz, ləyaqətli və davamlı şəkildə geri qayıtmasını onların qayıdacağı ərazilərin bərpası və əsas xidmətlərin yenidən qurulması ilə əlaqələndirməkdir.
Tərəflər strategiyanın icrası üçün mümkün mexanizmləri, o cümlədən prioritet ərazilərin və onların əsas ehtiyaclarının müəyyənləşdirilməsini müzakirə ediblər.
Görüş iştirakçıları düşərgələrin idarə olunmasına əsaslanan yanaşmadan geri qayıdış ərazilərinə və həmin icmalara investisiyaları nəzərdə tutan daha kompleks modelə keçidin vacibliyini vurğulayıblar.
Geri qayıdış ərazilərində infrastruktur bərpa olunacaq
Müzakirələrdə Suriya hökuməti, BMT qurumları, beynəlxalq təşkilatlar və özəl sektor arasında əməkdaşlığın əhəmiyyəti xüsusi qeyd olunub.
BMT-nin proqram və planlarının Suriya hökumətinin milli bərpa prioritetləri, xüsusilə də “Düşərgəsiz Suriya” strategiyası ilə uyğunlaşdırılmasının vacibliyi vurğulanıb.
Resursların və proqramların hökumətin rəhbərliyi, beynəlxalq tərəfdaşların əməkdaşlığı çərçivəsində prioritet geri qayıdış ərazilərinə yönəldilməsi təklif edilib.
Geri qayıdışın davamlı olması üçün həmin ərazilərdə infrastrukturun və əsas xidmətlərin bərpası əsas məsələlərdən biri kimi qiymətləndirilib.
Bu çərçivədə xəstəxanaların, tibb mərkəzlərinin, məktəblərin, su və kanalizasiya şəbəkələrinin, çörək sexlərinin, kommunal xidmətlərin, yolların və nəqliyyat infrastrukturunun ərazilərin ehtiyaclarına uyğun şəkildə yenidən qurulması nəzərdə tutulur.
“Düşərgəsiz Suriya” düşərgələrin dərhal bağlanması demək deyil
Görüşdə xüsusi olaraq vurğulanıb ki, “Düşərgəsiz Suriya” strategiyası qaçqın düşərgələrinin dərhal bağlanması və ya lazımi şərait yaradılmadan insanların geri qayıtmağa məcbur edilməsi məqsədi daşımır.
Strategiyanın əsas hədəfi geri qayıdış qarşısındakı maneələri aradan qaldırmaq, xidmətləri və infrastrukturu bərpa etmək, təhlükəsizliyi və sabitliyi gücləndirməklə məcburi köçkünlərin könüllü, təhlükəsiz, ləyaqətli və davamlı şəkildə öz yaşayış məntəqələrinə qayıtmasına şərait yaratmaqdır.
