BAKI,VOA,Yusif Şərifzadə

Fransanın telekommunikasiya şirkəti Orange və infrastruktur investoru Morrison süni intellekt və bulud xidmətlərinə artan tələbatı qarşılamaq məqsədilə Fransada birgə məlumat mərkəzi platforması yaratmağı planlaşdırdıqlarını açıqlayıblar.

VOA xəbər verir ki, tərəflər bu məqsədlə 50/50 pay bölgüsünə əsaslanan ortaq müəssisə yaratmağı nəzərdə tuturlar. Layihə çərçivəsində ümumilikdə 400 meqavat gücündə məlumat mərkəzi infrastrukturu qurulacaq ki, bu da Orange şirkətinin hazırkı məlumat mərkəzi tutumundan təxminən 10 dəfə çoxdur.

Şirkətlərin açıqlamasına görə, layihə Orange-ın mövcud aktivləri, Morrison-un kapital yatırımı və borc maliyyələşdirilməsi hesabına formalaşacaq 3 milyard avroluq investisiya proqramı ilə dəstəklənəcək.

Razılaşmaya əsasən, Orange Fransadakı beş məlumat mərkəzini birgə müəssisəyə daxil edəcək. Morrison isə platformanın genişləndirilməsi üçün kapital maliyyələşdirilməsi təmin edəcək.

Tərəflər sövdələşmənin 2026-cı ilin sonunadək imzalanacağını, bütün tənzimləyici təsdiqlər alındıqdan sonra isə 2027-ci ilin birinci rübündə tamamlanacağını bildiriblər.