Türkmənistan–Türkiyə Hökumətlərarası Komissiyasının 9-cu iclası Aşqabadda keçiriləcək

Türkmənistan ilə Türkiyə arasında ticarət-iqtisadi əməkdaşlıq sürətlə genişlənir və tərəflər qarşıdakı illərdə qarşılıqlı ticarət dövriyyəsini əhəmiyyətli dərəcədə artırmağı hədəfləyir. Diplomat qeyd edib ki, mövcud potensial nəzərə alınmaqla, yaxın gələcəkdə Türkmənistan ilə Türkiyə arasında ticarət həcmini 5 milyard ABŞ dollarına yüksəltmək mümkündür. Bu məqsədlə hər il Türkmənistanda təşkil olunan Türkiyə ixrac məhsullarının 12-ci sərgisinin 10-12 fevral tarixlərində Aşqabadda keçirilməsi planlaşdırılır.

28 Yanvar 2026 17:12

BAKI,AzerVoice, Fərid Mikayılov

AzerVoice xəbər verir ki, Türkiyənin Türkmənistandakı səfiri Əhməd Demirok mətbuat nümayəndələri ilə görüşündə bildirib ki, 2025-ci ilin yanvar–noyabr aylarında iki ölkə arasında ticarət dövriyyəsi təxminən 2 milyard ABŞ dollarına çatıb.

Diplomat qeyd edib ki, mövcud potensial nəzərə alınmaqla, yaxın gələcəkdə Türkmənistan ilə Türkiyə arasında ticarət həcmini 5 milyard ABŞ dollarına yüksəltmək mümkündür. Bu məqsədlə hər il Türkmənistanda təşkil olunan Türkiyə ixrac məhsullarının 12-ci sərgisinin 10-12 fevral tarixlərində Aşqabadda keçirilməsi planlaşdırılır.

Səfir xatırladıb ki, 2025-ci ilin iyul ayında Türkiyədə ilk dəfə “Türkmənistanın ixrac məhsulları sərgisi” təşkil olunub. Sözügedən tədbir iki ölkənin işgüzar dairələrinin bir araya gəlməsi və Türkmənistan məhsullarının Türkiyə bazarında tanıdılması baxımından mühüm əhəmiyyət daşıyıb.

İqtisadi əməkdaşlıq üzrə Türkmənistan–Türkiyə Hökumətlərarası Komissiyası ikitərəfli iqtisadi münasibətlərin inkişafında əsas mexanizmlərdən biri hesab olunur. Komissiyanın 8-ci iclası 2025-ci il fevralın 25-də Ankarada keçirilib.

Səfirin sözlərinə görə, komissiyanın növbəti – 9-cu iclasının isə 2026-cı ildə Aşqabadda keçirilməsi planlaşdırılır. Görüşün Türkiyə Respublikasının vitse-prezidenti Cevdet Yılmaz və Türkmənistan Nazirlər Kabineti sədrinin müavini Nökərgülü Ataquliyevin rəhbərliyi ilə baş tutacağı gözlənilir.

Məlumata əsasən, Türkiyə şirkətləri Türkmənistan müstəqillik qazandıqdan sonra ölkədə ümumi dəyəri 54 milyard ABŞ dollarını ötən mindən artıq layihəni uğurla həyata keçiriblər. Hazırda isə davam edən və planlaşdırılan yeni layihələr çərçivəsində türk şirkətlərinin təxminən 10 milyard ABŞ dolları dəyərində layihələr icra etməsi gözlənilir.

Bununla yanaşı, gələcəkdə “ağıllı şəhər” konsepsiyası əsasında inkişaf etdirilən Arkadağ şəhərinin ikinci mərhələsi kimi yeni layihələrdə də Türkiyə şirkətlərinin fəal iştirak etməyə hazır olduğu vurğulanıb.