Bakı, AzerVoice

Türkiyənin Xarici işlər naziri Hakan Fidan, Rusiya-Ukrayna müharibəsi ilə bağlı danışıqlar yolu ilə sülhün bərqərar olması üçün Türkiyənin hər cür dəstəyə və vasitəçiliyə hazır olduğunu bildirib.

AzerVoice xəbər verir ki, O, Rusiyanın xarici işlər naziri Sergey Lavrovla birgə mətbuat konfransında çıxış edərək, Türkiyə və Rusiyanın ikitərəfli və beynəlxalq məsələlərdə əməkdaşlığını daha da gücləndirməyi hədəflədiyini vurğulayıb.

Fidan, müharibənin qlobal təsirlərinə diqqət çəkərək, sülh üçün tərəfləri İstanbulda masa arxasında bir araya gətirdiklərini və bu istiqamətdə diplomatik səyləri davam etdirdiklərini qeyd edib. O, ABŞ-ın irəli sürdüyü yeni təşəbbüsə də toxunaraq, danışıqlar yolu ilə həll yolunun tapılmasını dəstəklədiklərini bildirib.

Suriyadakı vəziyyətə də toxunan nazir, ölkədə sabitlik və firavanlıq üçün ümidverici addımların atıldığını qeyd edib. O, Türkiyənin Suriyanın ərazi bütövlüyünü dəstəklədiyini və terror təşkilatlarına qarşı mübarizənin davam etdiriləcəyini vurğulayıb.

Nazir Qəzzadakı vəziyyətin müzakirə edildiyini, atəşkəsin daimi olması və İsrailin İordan çayının qərb sahilindəki addımlarının dayandırılmasının vacibliyini vurğulayıb.

“Yeni soyqırıma heç vaxt yol verilməməlidir. Fələstinlilərin zorla köçürülməsi qəbuledilməzdir və uğursuzluğa məhkumdur. İsrailin Fələstində, Livanda və Suriyada təcavüzünü dayandırması üçün beynəlxalq ictimaiyyətin qətiyyətli mövqe tutması vacibdir,” – deyə Fidan qeyd edib.