Bakı, AzerVoice

Türkiyədə artıq müəssisələrlə yanaşı istehlakçılardan da dəyəri 7 min lirədən çox olan mal və ya xidmət alış-verişi zamanı banklar və ya vasitəçi maliyyə qurumları üzərindən ödəniş etmələri tələb olunacaq.

AzerVoice xəbər verir ki, bununla bağlı Türkiyə Gelir İdaresi Başkanlığı (GİB) qanunveriliclikdə edilmiş dəyişikliklər haqqında məlumat verib.

Yeni qaydaların qüvvəyə minəcəyi təqdirdə, artıq son istehlakçılar da sənədləşmə öhdəliyi dairəsinə daxil ediləcəklər. Sənədləşmə öhdəliyi çərçivəsində olanlar 7 min lirəni aşan ödəmə və pul qəbulunda banklar və ya vasitəçi maliyyə qurumlarından istifadə etmələri tələb olunacaq.

7 min lirəni keçən hər cür alış-verişin ödənişini maliyyə qurumları vasitəsilə həyata keçirməyənlər, başqa sözlə, əl ilə nəğd şəkildə edənlər, son istehlakçı da daxil olmaqla, hər fakta görə ödəniş məbləğinin 10 faizi miqdarında cərimələnəcək. Onu da qeyd edək ki, son istehlakçıya tətbiq ediləcək cərimənin məbləği 5 min lirədən az ola bilməz.

Son istehlakçı ödənişin əl ilə edildiyini ödənişdən sonra 5 iş günü ərzində özü nazirliyə bildirərsə, son istehlakçı adına qanun pozuntusuna görə xüsusi cərimə tətbiq edilməyəcək.

Verilən məlumata görə, alış-veriş zamanı alınan və verilən ödənişlərin vasitəçi maliyyə qurumları üzərindən həyata keçirilməsi kölgə iqtisadiyyatının qarşısının alınmasına böyük töhfə verəcək. Həmçinin iqtisadi fəaliyyətlər vergi idarələri tərəfindən daha asan təqib ediləcəyi üçün vergi bazası genişlənəcək.