BAKI, AzerVoice
Türkiyə Xarici İşlər Nazirliyi, Avropa Parlamenti (AP) Baş Assambleyasında qəbul edilən 2023–2024 Türkiyə Hesabatını tənqid edib.
AzerVoice xəbər verir ki, bu haqda nazirliyin verdiyi açıqlamada deyilir.
“Avropa Parlamenti tərəfindən bu gün qəbul edilən 2023–2024 Türkiyə Hesabatı ölkəmiz əleyhinə təhrif olunmuş, qərəzli və həqiqətə uyğun olmayan iddialar ehtiva edir. Terror təşkilatlarına və Türkiyə düşmənliyini varlıq səbəbinə çevirən bəzi çevrələrə təbliğat zəmini yaradan bu qurumun, ölkəmizdəki siyasi vəziyyət, xarici siyasət və Prezidentimizin (Rəcəb Tayyib Ərdoğan - red.) Şimali Kipr Türk Respublikasına səfəri ilə bağlı əsassız fikirlərini qətiyyətlə rədd edirik” - deyə, açıqlamada qeyd olunub.
Açıqlamanın sonunda qeyd olunub ki, gələcək dövrdə, Türkiyənin Avropa İttifaqına (Aİ) üzvlük prosesi də daxil olmaqla, Avropa İttifaqı ilə münasibətlərin qarşılıqlı fayda əsasında davam etdirilməsi üçün Avropa Parlamentindən üzərinə düşən məsuliyyəti yerinə yetirməsi gözlənilir.
