BAKI, AzerVoice
ROKETSAN-ın baş direktoru Murat İkinci, yerli və milli imkanlarla hazırlanmış ballistik raket sistemi TAYFUN BLOK-4-ün inkişaf mərhələsinin sonlarına yaxınlaşdığını və test atışlarına yaxın zamanda başlanacağını açıqlayıb.
AzerVoice xəbər verir ki, İkinci bildirib ki, TAYFUN ailəsi yalnız bir raketdən ibarət deyil və bu layihə əməliyyat növləri və döyüş başlıqları baxımından daha da genişlənəcək.
“TAYFUN geniş bir ailədir və daha da genişlənəcək. Həm döyüş başlığı müxtəlifliyi, həm də yerinə yetiriləcək tapşırıqlara uyğun olaraq blokları artırılacaq.”- deyə İkinci qeyd edib.
Murat İkinci, TAYFUN-un hipersəs sürəti və inkişaf etmiş sensor sistemləri ilə də seçildiyini vurğulayıb.
“Bu sensörlər həm hədəfi dəqiq şəkildə vurmaq, həm də döyüş sahəsindəki təsirlərdən qorunmaq üçün müxtəlif texnologiyalarla təchiz edilib.”
Baş direktor əlavə edib ki, TAYFUN BLOK-4, ailənin ən inkişaf etmiş versiyalarından biri hesab olunur və əlavə bloklarla bağlı işlər də davam edir.
“Bəzi AR-GE layihələri müəyyən səviyyəyə çatmadan dayandırıla bilər, lakin TAYFUN ailəsi öz imkan və qabiliyyətlərini artırmaqda davam edəcək. Əlavə bloklar da hazırlanır və uyğun vaxtda ictimaiyyətlə paylaşılacaq.” - deyə İkinci vurğulayıb.
