BAKI, AzerVoice, Nərmin Ağayeva
Zəngəzur dəhlizi Türkiyənin qlobal logistika liderliyi yolunda strateji açar olacaq.
AzerVoice xəbər verir ki, ABŞ-ın vasitəçiliyi ilə Azərbaycan və Ermənistan arasında imzalanan yeni razılaşma Zəngəzur dəhlizinin istismara verilməsini təmin edəcək. ABŞ prezidenti Donald Tramp 99 ilə qədər uzadılmış razılaşma çərçivəsində Azərbaycanın Naxçıvana çıxış əldə edəcəyini, Ermənistanın isə suverenliyinə hörmət ediləcəyini bildirib.
Ekspertlərə görə, bu dəhliz Türkiyə üçün yalnız nəqliyyat marşrutu deyil, həm də enerji, nəqliyyat və rəqəmsal infrastruktur baxımından yeni inteqrasiya imkanları təqdim edəcək. Dəmir yolları, neft-qaz kəmərləri və fiber-optik şəbəkələr Türkiyəni regional enerji və kommunikasiya mərkəzinə çevirə bilər.
Beynəlxalq Nəqliyyat və Logistika Xidmət Təchizatçıları Dərnəyinin (UTİKAD) prezidenti Bilgehan Engin deyib ki, Zəngəzur xətti Orta Dəhlizin effektivliyini artıraraq tranzit vaxtlarını əhəmiyyətli dərəcədə azaldacaq, logistika xərclərini aşağı salacaq və Türk dövlətləri ilə fasiləsiz logistik körpü yaradacaq.
Engin həmçinin xəbərdarlıq edib ki, layihənin ABŞ idarəçiliyi ilə həyata keçirilməsi sürət baxımından üstünlüklər versə də, Çin, Rusiya və digər regional güclərlə geosiyasi risklər yarada bilər. Bu səbəbdən Türkiyə prosesdə strateji muxtariyyətini qorumağa xüsusi diqqət yetirməlidir.
Strateji tövsiyələrə regional infrastrukturun uyğunlaşdırılması, gömrük sistemlərində rəqəmsal inteqrasiya, Marmaray-ın yükdaşıma gücünün artırılması və Yavuz Sultan Səlim Körpüsünə dəmir yolu bağlantısının tamamlanması daxildir.
"Zəngəzur təkcə yük daşımayacaq, həm də mədəniyyətləri, iqtisadiyyatları və strateji tərəfdaşlıqları birləşdirəcək. Bu, Türkiyə üçün gələcəyə açılan strateji qapıdır." - Engin yekun olaraq bildirib.
